ଜଣାପଡ଼ିଲା ଓସିଏ ସଭାପତି ପଦରୁ କାହିଁକି ଇସ୍ତଫା ଦେଲେ ବବି ଦାସ?

କଟକ: ଓଡ଼ିଶା କ୍ରିକେଟ୍ ଆସୋସିଏସନ୍ (ଓସିଏ)ର ସଭାପତି ପଦରୁ ବିଜେଡି ନେତା ପ୍ରଣବ ପ୍ରକାଶ ଦାସ ଆନୁଷ୍ଠାନିକ ଭାବେ ଇସ୍ତଫା ଦେଇଛନ୍ତି ବୋଲି ଓସିଏ ସମ୍ପାଦକ ସଞ୍ଜୟ ବେହେରା ସୂଚନା ଦେଇଛନ୍ତି। ଅକ୍ଟୋବର ୨୮, ୨୦୨୨ରେ ବିନା ପ୍ରତିଦ୍ୱନ୍ଦ୍ୱିତାରେ ନିର୍ବାଚିତ ହୋଇଥିବା ପ୍ରଣବ ପ୍ରକାଶ ଦାସ ଇସ୍ତଫା ଦେବା ପଛରେ ବ୍ୟକ୍ତିଗତ କାରଣ ଦର୍ଶାଇଛନ୍ତି।

ଶ୍ରୀ ସଞ୍ଜୟ ବେହେରା କହିଛନ୍ତି ଯେ ସେ ବବି ଦାସଙ୍କୁ ପୁନର୍ବିଚାର କରିବାକୁ ଅନୁରୋଧ କରିଥିଲେ । କିନ୍ତୁ ସାମ୍ପ୍ରତିକ ରାଜନୈତିକ ବାତାବରଣ ଏବଂ ନିକଟରେ ହୋଇଥିବା ନିର୍ବାଚନରେ ତାଙ୍କ ଦଳର କ୍ଷମତା ହରାଇବା କାରଣରୁ ବବି ଦାସ ନିଜ ଦାୟିତ୍ୱ ନିର୍ବାହ କରିବାରେ ଅସମର୍ଥ ଅନୁଭବ କରିଛନ୍ତି।

ବିଶେଷ କରି ବାରବାଟୀ ଷ୍ଟାଡିୟମର ବିକାଶ ନେଇ ସଂଘରେ ତାଙ୍କର ପ୍ରଭାବଶାଳୀ ଯୋଗଦାନକୁ ନେଇ ବବି ଦାସ ଉଦବେଗ ପ୍ରକାଶ କରିଛନ୍ତି ବୋଲି ସଞ୍ଜୟ ବେହେରା ଏକ ସାମ୍ବାଦିକ ସମ୍ମିଳନୀରେ ପ୍ରକାଶ କରିଛନ୍ତି। ସେ ଉଲ୍ଲେଖ କରିଛନ୍ତି ଯେ ବବି ଦାସ ବୈଠକରେ ଯୋଗ ଦେଉ ନାହାନ୍ତି ଏବଂ ବର୍ତ୍ତମାନ ପରିସ୍ଥିତିରେ ସେ ସଭାପତି ଭାବରେ ଠିକଭାବେ ଦାୟିତ୍ୱ ନିର୍ବାହ କରିପାରୁ ନାହାନ୍ତି ।

ବବି ଦାସଙ୍କ ଇସ୍ତଫାକୁ ଦୃଷ୍ଟିରେ ରଖି ଓସିଏ ଉପସଭାପତି ପଙ୍କଜ ଲୋଚନ ମହାନ୍ତି କାର୍ଯ୍ୟକାରୀ ସଭାପତି ଭାବେ ନିଯୁକ୍ତ କରାଯାଇଛି। ଓସିଏର ସମ୍ବିଧାନ ଅନୁଯାୟୀ ୪୫ ଦିନ ମଧ୍ୟରେ ନୂଆ ସଭାପତି ନିର୍ବାଚିତ ହେବା କଥା। ବାରବାଟୀ ଷ୍ଟାଡିୟମରେ ହେବାକୁ ଥିବା ଆଗାମୀ ଦିନିକିଆ ଅନ୍ତର୍ଜାତୀୟ ମ୍ୟାଚ ପରେ ଏହି ନିର୍ବାଚନ ଅନୁଷ୍ଠିତ ହେବ ବୋଲି ଆଶା କରାଯାଉଛି ।