ଏସ୍ ସୋମନାଥଙ୍କ କାର୍ଯ୍ୟକାଳ ଶେଷ, ଇସ୍ରୋ ମୁଖ୍ୟ ଭାବେ ନିଯୁକ୍ତ ହେଲେ ଭି ନାରାୟଣନ୍

ନୂଆଦିଲ୍ଲୀ: ବରିଷ୍ଠ ମହାକାଶ ବୈଜ୍ଞାନିକ ଭି ନାରାୟଣନଙ୍କୁ ଭାରତୀୟ ମହାକାଶ ଗବେଷଣା ସଂଗଠନ (ଇସ୍ରୋ)ର ନୂତନ ଅଧ୍ୟକ୍ଷ ଭାବେ ନିଯୁକ୍ତ କରାଯାଇଛି। ଜାନୁଆରୀ ୧୪ରେ ସେ ବର୍ତ୍ତମାନର ସଭାପତି ଏସ୍ ସୋମନାଥଙ୍କ ଠାରୁ ଦାୟିତ୍ୱ ଗ୍ରହଣ କରିବେ।

ଏସ୍ ସୋମନାଥ ୧୪ ଜାନୁଆରୀ ୨୦୨୨ରେ ଇସ୍ରୋର ଅଧ୍ୟକ୍ଷ ଭାବେ ଦାୟିତ୍ୱ ଗ୍ରହଣ କରିଥିଲେ ଏବଂ ବର୍ତ୍ତମାନ ଦୁଇ ବର୍ଷର କାର୍ଯ୍ୟକାଳ ପରେ ଅବସର ନେଉଛନ୍ତି। ତାଙ୍କ କାର୍ଯ୍ୟକାଳ ମଧ୍ୟରେ ଇସ୍ରୋ ଅନେକ ଗୁରୁତ୍ୱପୂର୍ଣ୍ଣ ମିଶନକୁ ସଫଳତାର ସହ ସମ୍ପନ୍ନ କରିଛି।

୭ ଜାନୁଆରୀ ୨୦୨୫ରେ କ୍ୟାବିନେଟର ନିଯୁକ୍ତି କମିଟି ଦ୍ୱାରା ଜାରି କରାଯାଇଥିବା ଏକ ସରକାରୀ ଆଦେଶ ଅନୁଯାୟୀ, ନାରାୟଣନଙ୍କୁ ଦୁଇ ବର୍ଷ ପାଇଁ ଇସ୍ରୋର ନୂତନ ଅଧ୍ୟକ୍ଷ ଭାବେ ନିଯୁକ୍ତ କରାଯାଇଛି।  ବର୍ତମାନ ସେ ଭାଲିଆମାଲାସ୍ଥିତ ଲିକ୍ୱିଡ୍ ପ୍ରୋପଲସନ୍ ସିଷ୍ଟମ୍ ସେଣ୍ଟର (ଏଲପିଏସସି)ର ନିର୍ଦ୍ଦେଶକ ଅଛନ୍ତି।

ନାରାୟଣନ ତାଙ୍କ କ୍ୟାରିୟରରେ ଆଦିତ୍ୟ ମହାକାଶଯାନ ଏବଂ ଜିଏସଏଲଭି ଏମକେ-୩ ମିଶନ ଭଳି ପ୍ରମୁଖ ଇସ୍ରୋ ପ୍ରକଳ୍ପରେ ଗୁରୁତ୍ୱପୂର୍ଣ୍ଣ ଅବଦାନ ରଖିଛନ୍ତି । ତାଙ୍କୁ ଭାରତୀୟ ମହାକାଶଚାରୀ ସୋସାଇଟି ପକ୍ଷରୁ ଶ୍ରୀ ପୁରସ୍କାର ଏବଂ ଆଇଆଇଟି ଖଡ଼ଗପୁରର ବିଶିଷ୍ଟ ପୂର୍ବତନ ଛାତ୍ର ପୁରସ୍କାର ଭଳି ସମ୍ମାନଜନକ ସମ୍ମାନରେ ସମ୍ମାନିତ କରାଯାଇଛି।