୧୩ ଦିନ ଧରି ରାଜସ୍ୱ କର୍ମଚାରୀଙ୍କ ଆନ୍ଦୋଳନ: ମନ୍ତ୍ରୀଙ୍କ ଅଟଳ ମନୋଭାବ ନେଇ ପିସିସିର କଡ଼ା ସମାଲୋଚନା

ଭୁବନେଶ୍ୱର: ଓଡ଼ିଶାରେ ରାଜସ୍ୱ କର୍ମଚାରୀମାନେ ନିଜ କ୍ୟାଡର ପୁନର୍ଗଠନ, ପଦୋନ୍ନତି, ଦରମା ବୃଦ୍ଧି ଓ ଅନ୍ୟାନ୍ୟ ଦାବି ନେଇ ଗତ ୧୩ ଦିନ ଧରି ଆନ୍ଦୋଳନ ଜାରି ରଖିଛନ୍ତି। ଏହି ଆନ୍ଦୋଳନ ଯୋଗୁଁ ରାଜ୍ୟରେ ଜନସାଧାରଣଙ୍କ ଜରୁରୀ ରାଜସ୍ୱ ସେବା ବାଧାପ୍ରାପ୍ତ ହେଉଛି। ଓଡ଼ିଶା ରାଜସ୍ୱ ଅମଲା ସଂଘ ଅଧୀନରେ ୩୦ଟି ଜିଲ୍ଲାରେ ୧୦,୦୦୦ରୁ ଅଧିକ କର୍ମଚାରୀ ୧୦ ଦଫା ଦାବି ନେଇ ଏହି ଆନ୍ଦୋଳନରେ ସାମିଲ ହୋଇଛନ୍ତି।

ପ୍ରଦେଶ କଂଗ୍ରେସ କମିଟି (ପିସିସି) ସଭାପତି ଭକ୍ତଚରଣ ଦାସ ଏହି ପରିସ୍ଥିତି ପାଇଁ ରାଜସ୍ୱ ମନ୍ତ୍ରୀ ସୁରେଶ ପୂଜାରୀଙ୍କ ଅଟଳ ମନୋଭାବକୁ ଦାୟୀ କରିଛନ୍ତି। ସେ ଅଭିଯୋଗ କରିଛନ୍ତି ଯେ, କର୍ମଚାରୀମାନେ ବାରମ୍ବାର ସରକାରଙ୍କୁ ନିଜ ସମସ୍ୟା ସମ୍ପର୍କରେ ଅବଗତ କରାଇଥିଲେ ହେଁ କୌଣସି ସମାଧାନ ମିଳିନାହିଁ। ଶ୍ରୀ ଦାସ ଦାବି କରିଛନ୍ତି ଯେ, ମନ୍ତ୍ରୀ ନିଜ ଜିଦ୍ ଛାଡ଼ି ସଂଘର ନେତାମାନଙ୍କ ସହ ଆଲୋଚନା କରି ସମସ୍ୟାର ସମାଧାନ କରନ୍ତୁ, ଯାହା ଦ୍ୱାରା ରାଜ୍ୟବାସୀଙ୍କୁ ସୁବିଧା ମିଳିପାରିବ।

ରାଜସ୍ୱ କର୍ମଚାରୀଙ୍କ ଦାବି ମଧ୍ୟରେ ରହିଛି:
– ଜିଲ୍ଲା ରାଜସ୍ୱ କ୍ୟାଡର ନିୟମାବଳୀ ପ୍ରକାଶ ଓ ପଦୋନ୍ନତି ପ୍ରଦାନ।
– ସମସ୍ତ ଯୋଗ୍ୟ କର୍ମଚାରୀଙ୍କୁ ରାଜସ୍ୱ ମିନିଷ୍ଟେରିଆଲ ସେବା କ୍ୟାଡରରେ ଅନ୍ତର୍ଭୁକ୍ତ କରାଯିବା।
– ୟୁନିଫର୍ମ ଦରମା ଗଠନ ଓ ବେତନ ବୃଦ୍ଧି।
– ନୂଆ ସହକାରୀ ବିଭାଗୀୟ ଅଧିକାରୀ (ଏଏସଓ) ପଦ ସୃଷ୍ଟି।

ଏହି ଆନ୍ଦୋଳନ ଯୋଗୁଁ ରାଜ୍ୟରେ ଆୟ ପ୍ରମାଣପତ୍ର, ଜମି ପଟ୍ଟା, ଉତ୍ତରାଧିକାରୀ ପ୍ରମାଣପତ୍ର ଓ ଅନ୍ୟାନ୍ୟ ରାଜସ୍ୱ ସେବା ବ୍ୟାହତ ହେଉଛି। ଫଳରେ ଜନସାଧାରଣ ମଧ୍ୟ ଅସୁବିଧାର ସମ୍ମୁଖୀନ ହେଉଛନ୍ତି।

ରାଜସ୍ୱ ମନ୍ତ୍ରୀ ସୁରେଶ ପୂଜାରୀ କର୍ମଚାରୀମାନଙ୍କୁ ସୋମବାର କାର୍ଯ୍ୟରେ ଯୋଗଦେବାକୁ ଚେତାବନୀ ଦେଇଛନ୍ତି, ନଚେତ୍ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତ। ସେ ଅଭିଯୋଗ କରିଛନ୍ତି ଯେ, କିଛି ନେତା ଅନ୍ୟ ରାଜନୈତିକ ଦଳର ପ୍ରରୋଚନାରେ ଆନ୍ଦୋଳନକୁ ଉସୁକାଉଛନ୍ତି। ତଥାପି, କର୍ମଚାରୀମାନେ ନିଜ ଦାବିରେ ଅଟଳ ରହିଛନ୍ତି ଏବଂ ସମସ୍ତ ଦାବି ପୂରଣ ନହେବା ପର୍ଯ୍ୟନ୍ତ ଆନ୍ଦୋଳନ ଜାରି ରଖିବେ ବୋଲି ଘୋଷଣା କରିଛନ୍ତି।

ପିସିସି ସଭାପତି ଶ୍ରୀ ଦାସ ଆହୁରି କହିଛନ୍ତି, ପୂର୍ବତନ ବିଜେଡି ସରକାର ମଧ୍ୟ ଏହି ଦାବିଗୁଡ଼ିକ ପୂରଣ କରିବାରେ ବିଫଳ ହୋଇଥିଲେ। ବର୍ତ୍ତମାନ ବିଜେପି ସରକାର ମଧ୍ୟ ଏହା ପୂରଣ କରୁନାହିଁ, ଯାହା କର୍ମଚାରୀ ଓ ଜନସାଧାରଣଙ୍କ ପ୍ରତି ଅବହେଳା ଦର୍ଶାଉଛି। ସେ ସରକାରଙ୍କୁ ତୁରନ୍ତ ଆଲୋଚନା ଆରମ୍ଭ କରି ଏକ ସ୍ଥାୟୀ ସମାଧାନ ବାହାର କରିବାକୁ ଆହ୍ୱାନ ଦେଇଛନ୍ତି, ଯାହା ଦ୍ୱାରା ରାଜ୍ୟବାସୀଙ୍କ ଅସୁବିଧା ଦୂର ହେବ।