ରାଜନୀତି ଇତିହାସରେ ବିରଳ, ଏକାଠି ହୋଇଗଲେ ବିଜେପି ଓ କଂଗ୍ରେସ
ଥିରୁଅନନ୍ତପୁରମ: କଂଗ୍ରେସ ଏବଂ ଭାରତୀୟ ଜନତା ପାର୍ଟି (ବିଜେପି) ପରସ୍ପରର ଘୋର ବିରୋଧୀ । କିନ୍ତୁ ଏବେ ଏକାଠି ହୋଇଛନ୍ତି । ଯାହାକୁ ନେଇ ସାରା ଦେଶରେ ଚର୍ଚ୍ଚାର ବିଷୟ ପାଲଟିଛି । ଗୋଟିଏ ପ୍ରସଙ୍ଗରେ ଦୁଇ ଦଳ ଏକାଠି ହୋଇଛନ୍ତି। ବାମପନ୍ଥୀ ଶାସିତ କେରଳରେ ଏକ ଘରୋଇ ମଦ ଉତ୍ପାଦନ ୟୁନିଟ୍ ପ୍ରତିଷ୍ଠା ପ୍ରସ୍ତାବକୁ ବିରୋଧ କରି ଚାଲିଥିବା ଆନ୍ଦୋଳନରେ କଂଗ୍ରେସ ଓ ବିଜେପି ସାମିଲ ହୋଇଛନ୍ତି। ରବିବାର ଉଭୟ ଦଳ ପଲକ୍କଡ ଜିଲ୍ଲାରେ ବିକ୍ଷୋଭ ପ୍ରଦର୍ଶନ କରିଥିଲେ। ଅବକାରୀ ମନ୍ତ୍ରୀ ଏମ୍ ବି ରାଜେଶ ଏହି ବିକ୍ଷୋଭକୁ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି କହି ଖଣ୍ଡନ କରିଛନ୍ତି।
ପାଲକ୍କଡ଼ର କଂଗ୍ରେସ ସାଂସଦ ଭିକେ ଶ୍ରୀକନ୍ଦନ ଓଏସିସ୍ କମର୍ସିଆଲ ପ୍ରାଇଭେଟ୍ ଲିମିଟେଡର ପ୍ରକଳ୍ପକୁ ସମାଲୋଚନା କରିଛନ୍ତି। ଏଲାପୁଲି ପଂଚାୟତର ଚୁଟିପଡ଼ାରେ ଡିଷ୍ଟିଲିଂ ୟୁନିଟର କୌଣସି ଆବଶ୍ୟକତା ନାହିଁ ବୋଲି ସେ କହିଛନ୍ତି । ମଦ କମ୍ପାନି ଉପରେ ମନ୍ତ୍ରୀଙ୍କ ଏପରି ମନୋବୃତ୍ତି କୋଟି କୋଟି ଟଙ୍କାର ଲାଞ୍ଚ ନେବାର ପ୍ରମାଣ ବୋଲି ଶ୍ରୀକନ୍ଦନ କହିଛନ୍ତି। ଲୋକେ ପିଇବା ପାଣି ପାଇଁ ସଂଘର୍ଷ କରୁଥିବା ବେଳେ ଜଳ କର୍ତ୍ତୃପକ୍ଷ ୟୁନିଟକୁ ପାଣି ଯୋଗାଣ କରିବେ ବୋଲି ସରକାର କହିଛନ୍ତି।
କଂଗ୍ରେସ ବିଧାୟକ ଭିଡି ସତୀସନ ମନ୍ତ୍ରୀଙ୍କୁ କମ୍ପାନୀର ପ୍ରଚାର ପରିଚାଳକ ବୋଲି କହିଛନ୍ତି। ଏହି କମ୍ପାନୀର ମାଲିକମାନେ ଦିଲ୍ଲୀ ମଦ ନୀତି ମାମଲାରେ ସମ୍ପୃକ୍ତ ଅଛନ୍ତି ଏବଂ ପଞ୍ଜାବରେ ଭୂତଳ ଜଳକୁ ଦୂଷିତ କରିବା ପାଇଁ କେନ୍ଦ୍ର ଏବଂ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ସେମାନଙ୍କ ବିରୋଧରେ ମାମଲା ରୁଜୁ କରିଛନ୍ତି। କାହିଁକି ଏଭଳି କମ୍ପାନିକୁ ଅନୁମତି ଦିଆଗଲା?
ଅନୁମୋଦନ ପ୍ରକ୍ରିୟାର ସ୍ୱଚ୍ଛତା ଉପରେ ମଧ୍ୟ ସତୀସନ ପ୍ରଶ୍ନ ଉଠାଇଛନ୍ତି। ମଦ ନୀତିରେ ପରିବର୍ତ୍ତନ ଏବଂ ମଦ ଉତ୍ପାଦନକୁ ଅନୁମତି ଦେବା ପାଇଁ ସରକାରଙ୍କ ନିଷ୍ପତ୍ତି ବିଷୟରେ କେରଳରେ କାର୍ଯ୍ୟରତ କୌଣସି ମଦ କାରଖାନା ଅବଗତ ଥିଲେ କି? ମଧ୍ଯପ୍ରଦେଶ ଏବଂ ପଞ୍ଜାବରେ କାର୍ଯ୍ୟ କରୁଥିବା ଏହି କମ୍ପାନୀ ବ୍ୟତୀତ ଦେଶର ଅନ୍ୟ କୌଣସି କମ୍ପାନୀ ଏହି ନୀତି ପରିବର୍ତ୍ତନ ବିଷୟରେ ଅବଗତ ନଥିଲେ ।
ମନ୍ତ୍ରୀ ରାଜେଶ କହିଛନ୍ତି ଯେ ମଦ ଉତ୍ପାଦନକାରୀ କମ୍ପାନୀ ପ୍ରଚଳିତ ଆଇନ ଓ ନିୟମ ପାଳନ କରିବା ପରେ ପ୍ରାରମ୍ଭିକ ଅନୁମୋଦନ ପାଇଛି। ଜନସାଧାରଣଙ୍କ ସମ୍ମୁଖରେ ତଥ୍ୟ ଉପସ୍ଥାପନ କରାଯିବ। ପାଣିର ଶୋଷଣ କରିବାକୁ ଦିଆଯିବ ନାହିଁ। ପ୍ରସ୍ତାବିତ ମଦ କାରଖାନା ବିରୋଧରେ ସଂକଳ୍ପ ପାରିତ କରିବା ପାଇଁ ଏଲାପୁଲି ପଞ୍ଚାୟତ ସୋମବାର ଏକ ଜରୁରୀ ବୈଠକ ଡାକିଛି।
