ସଡ଼କ ଦୁର୍ଘଟଣାରେ ଅଲିମ୍ପିକ୍ ପଦକ ବିଜେତା ମନୁ ଭାକରଙ୍କ ଜେଜେମା ଓ କାକାଙ୍କ ମୃତ୍ୟୁ
ଚଣ୍ଡିଗଡ: ରବିବାର ଏକ ସଡ଼କ ଦୁର୍ଘଟଣାରେ ଅନ୍ତର୍ଜାତୀୟ ସୁଟର ମନୁ ଭାକରଙ୍କ ଜେଜେମା ଓ କାକାଙ୍କ ମୃତ୍ୟୁ ଘଟିଛି। ଆଜି ସକାଳ ପ୍ରାୟ ୯ଟା ବେଳେ ମହେନ୍ଦ୍ରଗଡ଼ ବାଇପାସ୍ ରାସ୍ତାରେ ଏକ ସ୍କୁଟି ଓ ବ୍ରେଜା କାର୍ ମୁହାଁମୁହିଁ ଧକ୍କା ହୋଇଥିଲା। ଦୁର୍ଘଟଣା ଏତେ ଗମ୍ଭୀର ଥିଲା ଯେ ଘଟଣାସ୍ଥଳରେ ମନୁ ଭାକରଙ୍କ ଜେଜେମା ଓ କାକାଙ୍କ ମୃତ୍ୟୁ ଘଟିଛି। ଦୁର୍ଘଟଣା ପରେ କାର୍ ଚାଳକ ଘଟଣାସ୍ଥଳରୁ ଫେରାର ହୋଇଯାଇଛି।
ମନୁ ଭାକର ଦୁଇ ଦିନ ତଳେ ରାଷ୍ଟ୍ରପତିଙ୍କ ଠାରୁ ଖେଳ ରତ୍ନ ପୁରସ୍କାର ଗ୍ରହଣ କରିଥିଲେ। ଘଟଣା ସମ୍ପର୍କରେ ଖବର ପାଇ ପୁଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ସିଭିଲ ହସ୍ପିଟାଲ ପଠାଇଛି। ସିଟି ଥାନା ଅଧିକାରୀ ଓ ପୁଲିସ ଘଟଣାର ତଦନ୍ତ କରୁଛନ୍ତି। ଏହି ଘଟଣା ମନୁ ଭାକରଙ୍କ ପରିବାର ପାଇଁ ଏକ ବଡ଼ ଝଟକା, ବିଶେଷକରି ସେ ନିକଟରେ ତାଙ୍କ କ୍ରୀଡାରେ ବଡ଼ ସଫଳତା ହାସଲ କରିଛନ୍ତି। ପୁଲିସ ସମସ୍ତ ପଦକ୍ଷେପ ନେବାକୁ ପ୍ରତିଶ୍ରୁତି ଦେବା ସହ ଫେରାର ଡ୍ରାଇଭରକୁ ଖୋଜୁଛି।
