ଏଲଆଇସି ‘ବୀମା ସଖୀ’ ଯୋଜନାରେ ମହିଳାଙ୍କୁ ମାସିକ ୭ ହଜାର ଟଙ୍କା

ନୂଆଦିଲ୍ଲୀ: ମହିଳା ସଶକ୍ତିକରଣ ପାଇଁ ଭାରତ ସରକାରଙ୍କ ବିଭିନ୍ନ ପ୍ରୟାସମାନଙ୍କ ମଧ୍ୟରେ ଭାରତୀୟ ଜୀବନ ବୀମା ନିଗମ (ଏଲଆଇସି) ଦ୍ୱାରା ଚାଲୁ ହୋଇଥିବା ‘ବୀମା ସଖୀ’ ଯୋଜନା ବିଶେଷ ଗୁରୁତ୍ୱ ଅର୍ଜନ କରିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୯ ଡିସେମ୍ବର ୨୦୨୪ରେ ହରିୟାଣାରେ ଏହି ଯୋଜନାର ଶୁଭାରମ୍ଭ କରିଥିଲେ।

ଏହି ଯୋଜନାର ମାଧ୍ୟମରେ ଗ୍ରାମାଞ୍ଚଳର ମହିଳାମାନଙ୍କୁ ତାଲିମ ଦେଇ ବୀମା ଏଜେଣ୍ଟ ଭାବରେ ପ୍ରସ୍ତୁତ କରାଯାଏ। ୩ ବର୍ଷୀୟ ତାଲିମ କାଳୀନ, ପ୍ରଥମ ବର୍ଷ ପ୍ରତିମାସ ୭,୦୦୦ ଟଙ୍କା, ଦ୍ୱିତୀୟ ବର୍ଷ ୬,୦୦୦ ଟଙ୍କା ଏବଂ ତୃତୀୟ ବର୍ଷ ୫,୦୦୦ ଟଙ୍କା ବୃତ୍ତି ଦିଆଯାଏ। ମୋଟ ୩ ବର୍ଷରେ ୨ ଲକ୍ଷ ଟଙ୍କାରୁ ଅଧିକ ଆର୍ଥିକ ସହାୟତା ମିଳିଥାଏ।

ତାଲିମ ସମୟରେ ପଲିସି ବିକ୍ରୟ କରି ପ୍ରଥମ ବର୍ଷରେ ୪୮,୦୦୦ ଟଙ୍କା ପର୍ଯ୍ୟନ୍ତ କମିଶନ ମଧ୍ୟ ରୋଜଗାର କରିପାରିବେ। ତାଲିମ ସମାପ୍ତି ପରେ ‘ବୀମା ସଖୀ’ ପ୍ରମାଣପତ୍ର ସହ ଏଲଆଇସି ଏଜେଣ୍ଟ କୋଡ୍ ମଧ୍ୟ ପ୍ରଦାନ କରାଯାଇଥାଏ, ଯାହାଦ୍ୱାରା ସେମାନେ ଆଧିକାରିକ ଭାବରେ ବୀମା ଏଜେଣ୍ଟ ଭାବେ କାମ କରିପାରିବେ।