ବନ୍ୟା, ଭୂମିକମ୍ପର ଆଗୁଆ ସୂଚନା ଦେବ ନିଶାର
ନୂଆଦିଲ୍ଲୀ: ନୂଆଦିଲ୍ଲୀ: ଭାରତୀୟ ମହାକାଶ ଗବେଷଣା ସଂଗଠନ (ଇସ୍ରୋ) ଓ ଆମେରିକାର ‘ନ୍ୟାସନାଲ ଏରୋନୋଟିକ୍ସ ଆଣ୍ଡ୍ ସ୍ପେସ୍ ଆଡ୍ମିନିଷ୍ଟ୍ରେସନ୍ (ନାସା)’ର ମିଳିତ ଉଦ୍ୟମରେ ନିସାର୍ ଉପଗ୍ରହର ସଫଳ ଉତ୍କ୍ଷେପଣ ହୋଇଛି। ଏହି ମିଳିତ ‘ନିଶାର ମିସନ୍’ ଏବେ କେବଳ ଭାରତ ପାଇଁ ନୁହେଁ ବରଂ ସମଗ୍ର ବିଶ୍ୱରେ ଜଳବାୟୁ ନିରୀକ୍ଷଣ ଏବଂ ବିପର୍ଯ୍ୟୟ ମୁକାବିଲାରେ ବୈପ୍ଳବିକ ପରିବର୍ତ୍ତନ ଆଣିବାକୁ ଯାଉଛି।
ଶ୍ରୀହରିକୋଟା ସ୍ଥିତ ସତୀଶ ଧାୱନ ମହାକାଶ କେନ୍ଦ୍ରରୁ ନାସା-ଇସ୍ରୋ ସିନ୍ଥେଟିକ୍ ଆପାର୍ଚର ରାଡାର୍ (ନିଶାର୍) ଉପଗ୍ରହର ସଫଳ ଉତ୍କ୍ଷେପଣ ସହ ଭାରତ ତା’ର ମହାକାଶ ଓ ଜଳବାୟୁ ଅଭିଯାନରେ ଏକ ମାଇଲଖୁଣ୍ଟ ଅତିକ୍ରମ କରିଛି। ଇସ୍ରୋର ଭୂସ୍ଥିର ସାଟେଲାଇଟ୍ ଲଞ୍ଚ ଭେଇକିଲ୍ (ଜିଏସ୍ଏଲ୍ଭି)ରେ ଭାରତୀୟ ସମୟ ଅପରାହ୍ଣ ୫ଟା ୪୦ମିନିଟ୍ରେ ୨୩୯୩ କିଲୋଗ୍ରାମ ଓଜନର ଏହି ଉପଗ୍ରହ ଉଡ଼ାଣ ଭରିଥିଲା। ନିଶାର୍ ହେଉଛି ବିଶ୍ୱର ପ୍ରଥମ ଆର୍ଥ ମ୍ୟାପିଂ ଉପଗ୍ରହ, ଯେଉଁଥିରେ ‘ଡୁଆଲ୍ ଫ୍ରିକ୍ୱେନ୍ସି ସିନ୍ଥେଟିକ୍ ଆପାର୍ଚର ରାଡାର୍’ ରହିଛି । ପ୍ରତି ୯୭ ମିନିଟ୍ରେ ପୃଥିବୀର ପରିକ୍ରମା କରିବା ପାଇଁ ନିଶାର୍ ଡିଜାଇନ୍ କରାଯାଇଛି, ଯେଉଁଥିରେ ପ୍ରତି ୧୨ ଦିନରେ ଅତୁଳନୀୟ ଇମେଜିଂ ସହିତ ପ୍ରାୟ ସମସ୍ତ ସ୍ଥଳ ଓ ବରଫ ପୃଷ୍ଠର ମ୍ୟାପିଂ କରାଯାଇପାରିବ। ଏହି ଉପଗ୍ରହ ମାଧ୍ୟମରେ ଭାରତ ବନ୍ୟା, ମରୁଡ଼ି ଏବଂ ଭୂସ୍ଖଳନର ପୂର୍ବାନୁମାନରେ ଉନ୍ନତି ଆଣିବାକୁ ଯାଉଛି, ଯାହା କି ଯୁଗାନ୍ତକାରୀ ସାବ୍ୟସ୍ତ ହେବ। ଏହି ଐତିହାସିକ ଅଭିଯାନ କେବଳ ମହାକାଶ ଭିତ୍ତିକ ଜଳବାୟୁ ନିରୀକ୍ଷଣ କ୍ଷେତ୍ରରେ ଭାରତର ଅଗ୍ରଣୀ ସ୍ଥାନକୁ ସୁଦୃଢ଼ କରିବ ନାହିଁ ବରଂ ଆନ୍ତର୍ଜାତିକ ସ୍ତରରେ ବୈଜ୍ଞାନିକ ପ୍ରଗତିକୁ ପ୍ରୋତ୍ସାହିତ କରିବାରେ ନିର୍ଣ୍ଣାୟକ ଭୂମିକା ନେବ।
