ବାଲେଶ୍ବରରେ ପୁଣି ବନ୍ୟା ଆଶଙ୍କା, ଅଧିକାରୀଙ୍କୁ ସତର୍କ ରହିବାକୁ ନିର୍ଦ୍ଦେଶ

ବାଲେଶ୍ବର: ଜିଲ୍ଲାରେ ପୁଣିଥରେ ବନ୍ୟା ପରିସ୍ଥିତି ସୃଷ୍ଟି ହେବାର ଆଶଙ୍କା ବଢିଛି। ଲଘୁଚାପ ଜନିତ ଲଗାଣ ବର୍ଷାର ପ୍ରଭାବରେ ଜଳକା ନଦୀର ଜଳସ୍ତର ବିପଦ ସଂକେତ ଉପରେ ପ୍ରବାହିତ ହେଉଛି। ସେପଟେ ବୁଢ଼ାବଳଙ୍ଗ ନଦୀର ଜଳସ୍ତର ମଧ୍ୟ ସତର୍କ ସଙ୍କେତ ଉପରେ ରହିଛି। ଏହି ପରିସ୍ଥିତି ଜିଲ୍ଲାବାସୀଙ୍କ ମଧ୍ୟରେ ଚିନ୍ତା ସୃଷ୍ଟି କରିଛି।

ସୁବର୍ଣ୍ଣରେଖା ନଦୀରେ ମଧ୍ୟ ପାଣିସ୍ତର ଅଧିକ ରହିଥିବାରୁ ଜିଲ୍ଲା ପ୍ରଶାସନ ସତର୍କ। ଯାତାୟାତ ବ୍ୟବସ୍ଥାକୁ ସୁଚାଳୁ ରଖିବା ପାଇଁ କେତେକ ରାସ୍ତାରେ ନିୟନ୍ତ୍ରଣ ଜାରି କରାଯାଇଛି। କିଛି ଅଞ୍ଚଳରେ ରୋଡ୍ ଡ୍ୟାମେଜ୍ ହେବାରୁ ଯାତାୟାତ ଅସୁବିଧା ସୃଷ୍ଟି ହେବାର ଖବର ମିଳିଛି।

ପରିସ୍ଥିତିକୁ ଦୃଷ୍ଟିରେ ରଖି, ଜିଲ୍ଲା ପ୍ରଶାସନ ସମସ୍ତ ଅଧିକାରୀଙ୍କୁ ମୁଖ୍ୟାଳୟରେ ଉପସ୍ଥିତ ରହିବାକୁ ନିର୍ଦ୍ଦେଶ ଦେଇଛି। ପାଣିସ୍ତର ଆଉ ବଢିଲେ ନିମ୍ନାଞ୍ଚଳର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ପାଇଁ ପ୍ରସ୍ତୁତି ଚାଲିଛି।