ପରଲୋକରେ ଲୋକପ୍ରିୟ ଅଭିନେତା ଫିଶ୍ ଭେଙ୍କଟ

ହାଇଦ୍ରାବାଦ: ତେଲୁଗୁ ସିନେମା ଜଗତରୁ ଆଉ ଏକ ଦୁଃଖଦ ଖବର ସାମ୍ନାକୁ ଆସିଛି । ବରିଷ୍ଠ ଅଭିନେତା ତଥା ହାସ୍ୟ କଳାକାର ତେଲୁଗୁ ଅଭିନେତା ଫିଶ୍ ଭେଙ୍କଟ ମାତ୍ର ୫୩ ବର୍ଷ ବୟସରେ ପ୍ରାଣ ହରାଇଛନ୍ତି । ସେ ଦୀର୍ଘ ଦିନ ଧରି କିଡନୀ ସମସ୍ୟାରେ ପୀଡ଼ିତ ଥିଲେ ଏବଂ ଶେଷରେ କିଡନୀ ଫେଲ୍ ହେବା ଯୋଗୁଁ ତାଙ୍କର ମୃତ୍ୟୁ ଘଟିଛି ।

ଫିଶ୍ ଭେଙ୍କଟ ଗତ ନଅ ମାସ ଧରି ଗୁରୁତର କିଡନୀ ସମସ୍ୟାରେ ପୀଡ଼ିତ ଥିଲେ। । କିଛି ଦିନ ପୂର୍ବରୁ ତାଙ୍କ ସ୍ୱାସ୍ଥ୍ୟାବସ୍ଥା ଅଧିକ ଖରାପ ହେବା ପରେ ତାଙ୍କୁ ହାଇଦ୍ରାବାଦର ଚାନ୍ଦାନଗରସ୍ଥିତ ପିଆରକେ ହସ୍ପିଟାଲରେ ଭର୍ତ୍ତି କରାଯାଇଥିଲା। ଶେଷ ସମୟରେ ସେ ଭେଣ୍ଟିଲେଟର ସପୋର୍ଟରେ ଥିଲେ, କିନ୍ତୁ ଡାକ୍ତରଙ୍କ ସମସ୍ତ ଚେଷ୍ଟାପରେ ମଧ୍ୟ ବଞ୍ଚାଇ ପାରିନଥିଲେ।

ତାଙ୍କ ଝିଅ ଶ୍ରାବନ୍ତୀ ଏକ ସାକ୍ଷାତକାରରେ ଜଣାଇଥିଲେ ଯେ, ତାଙ୍କ ବାପାଙ୍କୁ କିଡନୀ ପ୍ରତିରୋପଣ ଆବଶ୍ୟକ, ଯାହା ପାଇଁ ପ୍ରାୟ ୫୦ ଲକ୍ଷ ଟଙ୍କା ଖର୍ଚ୍ଚ ହେବ। ପରିବାରର ଆର୍ଥିକ ଅବସ୍ଥା ଦୁର୍ବଳ ଥିବାରୁ ସେମାନେ ଆର୍ଥିକ ସହାୟତା ପାଇଁ ଜନସାଧାରଣ ଏବଂ ଚଳଚ୍ଚିତ୍ର ଜଗତ ନିକଟରେ ଆବେଦନ କରିଥିଲେ। ଅଭିନେତା ପବନ କଲ୍ୟାଣ ୨ ଲକ୍ଷ ଟଙ୍କା ଏବଂ ବିଶ୍ୱକ ସେନ ଓ ଜଣେ ତେଲଙ୍ଗାନା ମନ୍ତ୍ରୀ ମଧ୍ୟ ସାହାଯ୍ୟ ପ୍ରଦାନ କରିଥିଲେ। କିନ୍ତୁ ଉପଯୁକ୍ତ କିଡନୀ ଦାତା ମିଳି ନ ପାରିବା ଯୋଗୁଁ ପ୍ରତିରୋପଣ ସମ୍ଭବ ହୋଇନଥିଲା।

ଫିଶ୍ ଭେଙ୍କଟଙ୍କ ଅଭିନୟ ଯାତ୍ରା ୨୦୦୦ ମସିହାରେ ଦାସାରୀ ନାରାୟଣ ରାଓଙ୍କ ନିର୍ଦ୍ଦେଶନାରେ ନିର୍ମିତ ଫିଲ୍ମ ‘ସମ୍ମାକ୍କା ସାରକ୍କା‘ରୁ ଆରମ୍ଭ ହୋଇଥିଲା। ତାଙ୍କର ଅନନ୍ୟ ତେଲଙ୍ଗାନା ଉଚ୍ଚାରଣ ଏବଂ ଅସାଧାରଣ ହାସ୍ୟ ପ୍ରତିଭା ତାଙ୍କୁ ଦର୍ଶକଙ୍କ ମନରେ ଏକ ସ୍ୱତନ୍ତ୍ର ସ୍ଥାନ ଦେଇଥିଲା। ସେ ‘କୁଶୀ’, ‘ଆଦି’, ‘ବନୀ’, ‘ଗବ୍ବର ସିଂ’, ‘ଡିଜେଟିଲ୍ଲୁ’, ‘ଆଦୁର୍ସ’, ‘ମିରାପାକୟ’, ଓ ‘କଫି ୱିଥ୍ ଏ କିଲର୍’ ଭଳି ଅନେକ ସୁପରହିଟ୍ ଫିଲ୍ମରେ ଅଭିନୟ କରି ଦର୍ଶକଙ୍କୁ ହସାଇଥିଲେ ଏବଂ ଖଳନାୟକ ଭୂମିକାରେ ମଧ୍ୟ ଆକୃଷ୍ଟ କରିଥିଲେ। ତାଙ୍କର ଆଇକନିକ୍ ଡାଇଆଲଗ୍ “ଥୋଡାଗୋଟୁ ଚିନ୍ନା” ଫିଲ୍ମ ‘ଆଦି’ରୁ ଦର୍ଶକଙ୍କ ମଧ୍ୟରେ ବେଶ୍ ଲୋକପ୍ରିୟ ହୋଇଥିଲା।

ଫିଶ୍ ଭେଙ୍କଟଙ୍କ ଜନ୍ମ ୧୯୭୧ ମସିହା ଅଗଷ୍ଟ ୩ ତାରିଖରେ ଆନ୍ଧ୍ରପ୍ରଦେଶର ମଛଲୀପଟନମରେ ହୋଇଥିଲା। ସେ ହାଇଦ୍ରାବାଦର ମୁଶୀରାବାଦ ବଜାରରେ ମାଛ ବିକ୍ରୟ କରୁଥିବା ସମୟରେ ତାଙ୍କୁ “ଫିଶ୍ ଭେଙ୍କଟ” ନାମ ମିଳିଥିଲା, ଯାହା ପରେ ତାଙ୍କର ଚଳଚ୍ଚିତ୍ର ନାମ ହୋଇଥିଲା। ଅଭିନେତା ଶ୍ରୀହରିଙ୍କ ସହାୟତାରେ ସେ ଚଳଚ୍ଚିତ୍ର ଜଗତରେ ପ୍ରବେଶ କରିଥିଲେ। ତାଙ୍କର ପତ୍ନୀ ସୁବର୍ଣ୍ଣା ଏବଂ ଦୁଇ ଝିଅଙ୍କୁ ଛାଡ଼ି ସେ ଏହି ଦୁନିଆ ଛାଡ଼ି ଚାଲିଯାଇଛନ୍ତି। ତାଙ୍କ ମୃତ୍ୟୁ ଖବର ତେଲୁଗୁ ଚଳଚ୍ଚିତ୍ର ଜଗତରେ ଶୋକର ଛାୟା ଖେଳାଇ ଦେଇଛି। ଅନେକ ଅଭିନେତା ଓ ପ୍ରଶଂସକ ସୋସିଆଲ ମିଡିଆରେ ତାଙ୍କ ପାଇଁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି।