୯ ସେପ୍ଟେମ୍ବରରେ ଅନୁଷ୍ଠିତ ହେବ ଉପରାଷ୍ଟ୍ରପତି ନିର୍ବାଚନ: କିଏ ନେବେ ଧନଖଡ଼ଙ୍କ ସ୍ଥାନ?

ନୂଆଦିଲ୍ଲୀ :ଉପରାଷ୍ଟ୍ରପତି ନିର୍ବାଚନକୁ ନେଇ ବଡ଼ ସୂଚନା ଦେଇଛନ୍ତି ନିର୍ବାଚନ କମିଶନ। ଉପରାଷ୍ଟ୍ରପତି ପଦ ପାଇଁ ନିର୍ବାଚନ ୯ ସେପ୍ଟେମ୍ବରରେ ଅନୁଷ୍ଠିତ ହେବ, ୭ ଅଗଷ୍ଟରୁ ୨୧ ଅଗଷ୍ଟ ପର୍ଯ୍ୟନ୍ତ ନିର୍ବାଚନ ପାଇଁ ନାମାଙ୍କନ ଦାଖଲ କରାଯିବ।

ନିର୍ବାଚନ ଆୟୋଗଙ୍କ ସୂଚନା ଅନୁଯାୟୀ ଉପରାଷ୍ଟ୍ରପତି ପଦ ପାଇଁ ନିର୍ବାଚନ ୯ ସେପ୍ଟେମ୍ବରରେ ଅନୁଷ୍ଠିତ ହେବ। ପୂର୍ବତନ ଉପରାଷ୍ଟ୍ରପତି ଜଗଦୀପ ଧନଖଡ଼ ୨୧ ଜୁଲାଇରେ ତାଙ୍କର ସ୍ୱାସ୍ଥ୍ୟ ଜନିତ ସମସ୍ୟା କାରଣରୁ ହଠାତ୍ ଉପରାଷ୍ଟ୍ରପତି ପଦରୁ ଇସ୍ତଫା ଦେଇଥିଲେ। ନିର୍ବାଚନ କମିଶନ ଦ୍ୱାରା ଜାରି ହୋଇଥିବା ବିଜ୍ଞପ୍ତି ଅନୁଯାୟୀ, ୭ ଅଗଷ୍ଟରୁ ୨୧ ଅଗଷ୍ଟ ପର୍ଯ୍ୟନ୍ତ ନାମାଙ୍କନ ଦାଖଲ କରାଯିବ, ୨୨ ଅଗଷ୍ଟ ସୁଦ୍ଧା ନାମାଙ୍କନ ପତ୍ର ଯାଞ୍ଚ କରାଯିବ। ପ୍ରାର୍ଥୀମାନେ ଅଗଷ୍ଟ ୨୫ ସୁଦ୍ଧା ସେମାନଙ୍କର ନାମାଙ୍କନ ପ୍ରତ୍ୟାହାର କରିପାରିବେ ଏବଂ ୯ ସେପ୍ଟେମ୍ବର ସକାଳ ୧୦ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଭୋଟ ଗ୍ରହଣ କରାଯିବାର ଯୋଜନା କରିଛି ନିର୍ବାଚନ ଆୟୋଗ |

ପୂର୍ବତନ ଉପରାଷ୍ଟ୍ରପତି ଧନଖଡ଼ ସଂସଦର ମୌସୁମୀ ଅଧିବେଶନ ଆରମ୍ଭରେ ଇସ୍ତଫା ଦେଇଥିଲେ। ତାଙ୍କର ହଠାତ୍ ଇସ୍ତଫା ଭାରତର ରାଜନୈତିକ ଜଗତରେ ହଇଚଇ ସୃଷ୍ଟି କରିଥିଲା। ବିରୋଧୀ ଦଳ ଅଭିଯୋଗ କରିଥିଲେ ଯେ କେନ୍ଦ୍ର ସରକାରଙ୍କ ସହିତ ଧନଖଡ଼ଙ୍କ ସମ୍ପର୍କ ଭଲ ଚାଲୁନାହିଁ ଏବଂ ସେଥିପାଇଁ ଧନଖଡ଼ଙ୍କୁ ଇସ୍ତଫା ଦେବାପାଇଁ ଚାପ ପକାଇଥିଲେ ସରକାର।

ତେବେ ଭାରତରେ, ଉପରାଷ୍ଟ୍ରପତି ସଂସଦର ଉଭୟ ଗୃହର ସଦସ୍ୟଙ୍କ ଦ୍ୱାରା ନିର୍ବାଚିତ ହୁଅନ୍ତି। ସେ ନିର୍ବାଚିତ ହୁଅନ୍ତୁ କିମ୍ବା ମନୋନୀତ ହୁଅନ୍ତୁ ପରନ୍ତୁ ଲୋକସଭା ଏବଂ ରାଜ୍ୟସଭାର ସମସ୍ତ ସାଂସଦ ସେମାନଙ୍କର ଭୋଟ ପ୍ରଦାନ କରନ୍ତି। ଏହି ପ୍ରକ୍ରିୟା ଗୁପ୍ତ ବାଲଟ ମାଧ୍ୟମରେ କରାଯାଏ ଏବଂ ଉପରାଷ୍ଟ୍ରପତିଙ୍କୁ ଚୟନ କରିବା ପାଇଁ ମୋଟ ସାଂସଦ ସଂଖ୍ୟା ଆଧାରରେ ବହୁମତ ଆବଶ୍ୟକ। ଆଉ ଏକ ଗୁରୁତ୍ୱପୂର୍ଣ୍ଣ କଥା ହେଉଛି ଏହି ନିର୍ବାଚନ ଇଭିଏମ ଦ୍ୱାରା କରାଯାଏ ନାହିଁ ବରଂ ପୋଷ୍ଟାଲ୍ ବାଲଟ ମାଧ୍ୟମରେ କରାଯାଏ।
ଅନ୍ୟପଟେ, ଲୋକସଭାରେ ମୋଟ ୫୪୨ ସଦସ୍ୟ ମଧ୍ୟରୁ ଏନଡିଏର ୨୯୩ ସଦସ୍ୟ ଅଛନ୍ତି। ସେହି ସମୟରେ, ଇଣ୍ଡିଆ ଆଲାଏନ୍ସର ୨୩୪ ସଦସ୍ୟ ଅଛନ୍ତି। ରାଜ୍ୟସଭାର ୨୪୦ ସଦସ୍ୟଙ୍କ ମଧ୍ୟରୁ, ଏନଡିଏ ପ୍ରାୟ ୧୩୦ ସାଂସଦଙ୍କ ସମର୍ଥନ ପାଇଛି ଏବଂ ଇଣ୍ଡିଆ ଆଲାଏନ୍ସକୁ ୭୯ ସାଂସଦଙ୍କ ସମର୍ଥନ ମିଳିଛି। ତେଣୁ, ଏନଡିଏ ମୋଟ ୪୨୩ ସାଂସଦଙ୍କ ସମର୍ଥନ ପାଇଛି ଏବଂ ଇଣ୍ଡିଆ ଆଲାଏନ୍ସକୁ ୩୧୩ ସାଂସଦଙ୍କ ସମର୍ଥନ ମିଳିଛି। ବାକି ସଦସ୍ୟମାନେ କୌଣସି ଦଳରେ ସାମିଲ ହୋଇ ନାହାନ୍ତି।