ବିଜେଡିକୁ ବଡ଼ ଝଟକା: ଅନାସ୍ଥା ଆଗରୁ ଦେଲେ ଇସ୍ତଫା ଦେଲେ ପ୍ରଣବଙ୍କ ଭାଇ

ଧର୍ମଶାଳା: ଯାଜପୁର ଜିଲ୍ଲାର ଧର୍ମଶାଳାରେ ବିଜୁ ଜନତା ଦଳ (ବିଜେଡି) ପାଇଁ ଏକ ବଡ଼ ଝଟକା ଲାଗିଛି। ଧର୍ମଶାଳା ପଞ୍ଚାୟତ ସମିତିର ଅଧ୍ୟକ୍ଷ ପ୍ରଭାତ କୁମାର ବଳବନ୍ତରାୟ ସ୍ବେଛାକୃତ ଭାବେ ନିଜ ପଦରୁ ଇସ୍ତଫା ଦେଇଛନ୍ତି। ଏହି ନିଷ୍ପତ୍ତି ଆଗାମୀ ୨୨ ତାରିଖରେ ତାଙ୍କ ବିରୋଧରେ ଆସିବାକୁ ଥିବା ଅନାସ୍ଥା ପ୍ରସ୍ତାବ ପୂର୍ବରୁ ନେଇଛନ୍ତି । ପ୍ରଭାତ ଧର୍ମଶାଳା ବିଡିଓଙ୍କୁ ନିଜର ଇସ୍ତଫା ପତ୍ର ପ୍ରଦାନ କରିଥିବା ଜଣାଯାଇଛି।

ପ୍ରଭାତ ବଳବନ୍ତରାୟ ନିଜ ବାର୍ତ୍ତାରେ କହିଛନ୍ତି, “ଧର୍ମଶାଳାର ସମସ୍ତ ପଞ୍ଚାୟତ ପ୍ରତିନିଧି ଓ ସେମାନଙ୍କ ପରିଜନଙ୍କ ସୁରକ୍ଷା ଦୃଷ୍ଟିରୁ ମୁଁ ଆଜି ଅଧ୍ୟକ୍ଷ ପଦରୁ ଇସ୍ତଫା ଦେଇଛି। ଆପଣମାନଙ୍କର ମୋ ପ୍ରତି ଥିବା ଭଲପାଇବା ପାଇଁ ମୁଁ ଆପଣମାନଙ୍କ ପାଖରେ ଚିର ଋଣୀ ରହିବି।”

ଏହା ପୂର୍ବରୁ ଧର୍ମଶାଳାରେ ବିଜେଡିର ରାଜନୈତିକ ପ୍ରଭାବକୁ ନେଇ ଏକ ବଡ଼ ଧକ୍କା ଲାଗିଥିଲା। ପ୍ରଭାତଙ୍କ ଭାଇ ତଥା ପୂର୍ବତନ ବିଧାୟକ ପ୍ରଣବ କୁମାର ବଳବନ୍ତରାୟ ୨୦୨୪ ନିର୍ବାଚନରେ ସ୍ୱାଧୀନ ପ୍ରାର୍ଥୀ ହିମାଂଶୁ ଶେଖର ସାହୁଙ୍କ ନିକଟରୁ ୪,୧୫୦ ଭୋଟ ବ୍ୟବଧାନରେ ପରାଜିତ ହୋଇଥିଲେ। ପ୍ରଣବ ୨୦୧୪ ଓ ୨୦୧୯ ନିର୍ବାଚନରେ ବିଜେଡି ଟିକେଟରେ ଧର୍ମଶାଳାରୁ ବିଧାୟକ ଭାବେ ନିର୍ବାଚିତ ହୋଇଥିଲେ, କିନ୍ତୁ ୨୦୨୪ରେ ତାଙ୍କର ପରାଜୟ ଦଳ ପାଇଁ ଏକ ବଡ଼ ଆଘାତ ଥିଲା। ପ୍ରଣବ ବଳବନ୍ତରାୟ, ଯିଏକି ପୂର୍ବତନ ମନ୍ତ୍ରୀ ତଥା ରାଜ୍ୟସଭା ସାଂସଦ କଲ୍ପତରୁ ଦାସଙ୍କ ପୁତ୍ର, ନିର୍ବାଚନ ପରାଜୟ ପରେ ମଧ୍ୟ ବିଭିନ୍ନ ଘଟଣାରେ ଚର୍ଚ୍ଚାରେ ରହିଛନ୍ତି। ୨୦୨୪ ଅକ୍ଟୋବରରେ ତାଙ୍କ ଗାଡ଼ି ଉପରେ ଅଣ୍ଡା ଫିଙ୍ଗାଯାଇଥିଲା ଏବଂ ୨୦୨୫ ଏପ୍ରିଲରେ ବରୁଆ ଗାଁରେ ହିଙ୍ଗୁଳା ଯାତ୍ରା ସମୟରେ ତାଙ୍କ ଉପରେ ଆକ୍ରମଣ ଓ ଗାଡ଼ି ଭଙ୍ଗାରୁଜା ହୋଇଥିଲା। ଏହି ଘଟଣାଗୁଡ଼ିକ ଧର୍ମଶାଳାରେ ରାଜନୈତିକ ଉତ୍ତେଜନାକୁ ଆହୁରି ବଢ଼ାଇଥିଲା । ପ୍ରଭାତଙ୍କ ଇସ୍ତଫା ଏବଂ ପ୍ରଣବଙ୍କ ନିର୍ବାଚନୀ ପରାଜୟ ଧର୍ମଶାଳାରେ ବିଜେଡିର ରାଜନୈତିକ ପ୍ରଭାବକୁ ଦୁର୍ବଳ କରିଛି। ରାଜନୈତିକ ବିଶ୍ଳେଷକମାନେ କହୁଛନ୍ତି ଯେ ଏହି ଘଟଣାଗୁଡ଼ିକ ଅଞ୍ଚଳରେ ବିଜେଡିର ସଙ୍ଗଠନକୁ ଆହୁରି ଦୁର୍ବଳ କରିପାରେ। ପ୍ରଭାତଙ୍କ ଇସ୍ତଫା ପରେ ନୂଆ ଅଧ୍ୟକ୍ଷ ନିଯୁକ୍ତି ପାଇଁ ପ୍ରକ୍ରିୟା ଶୀଘ୍ର ଆରମ୍ଭ ହେବ ବୋଲି ସୂଚନା ମିଳିଛି।