ଅଙ୍ଗନବାଡ଼ି କର୍ମୀଙ୍କ ଦରମା ବୃଦ୍ଧି ପ୍ରସ୍ତାବରେ ସ୍ୱର ଉତ୍ତୋଳନ କଲେ ଉପମୁଖ୍ୟମନ୍ତ୍ରୀ
ଭୁବନେଶ୍ୱର: ଅଙ୍ଗନବାଡ଼ି କର୍ମୀଙ୍କ ଦରମା ବୃଦ୍ଧି ଦାବିରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା କେନ୍ଦ୍ର ସରକାରଙ୍କ ଦ୍ୱାରସ୍ଥ ହୋଇଛନ୍ତି। ନିକଟରେ ରାଜସ୍ଥାନର ଉଦୟପୁରଠାରେ ଆୟୋଜିତ ଏକ କର୍ମଶାଳାରେ ଏହି ପ୍ରସ୍ତାବ ଉପସ୍ଥାପନ କରାଯାଇଛି ବୋଲି ସେ କହିଛନ୍ତି। ଆମେ ନିର୍ବାଚନୀ ଇସ୍ତାହାରରେ ଅଙ୍ଗନବାଡ଼ି କର୍ମୀଙ୍କ ଦରମା ବୃଦ୍ଧି କରିବାକୁ ପ୍ରତିଶ୍ରୁତି ଦେଇଥିଲୁ। ଏହି ପ୍ରସ୍ତାବ ମହିଳା ଓ ଶିଶୁ ବିକାଶ ମନ୍ତ୍ରଣାଳୟ ବିଚାରାଧୀନ ରହିଛି।
ଗତ ଜାନୁଆରି ୧୦ରୁ ୧୫ ତାରିଖ ପର୍ଯ୍ୟନ୍ତ ୫ ଦିନିଆ ରାଜସ୍ଥାନ ଗସ୍ତ ସମୟରେ ପ୍ରଭାତୀ ପରିଡ଼ା ଏଭଳି ପ୍ରସ୍ତାବ ଦେଇଥିବା ସେ କହିଛନ୍ତି। ତେବେ ଅଙ୍ଗନବାଡି କର୍ମୀଙ୍କ ଦରମା କେବେ ବୃଦ୍ଧି କରାଯିବ ତାହା ସ୍ପଷ୍ଟ ହୋଇନାହିଁ। ଏହାବ୍ୟତୀତ ଉନ୍ନତ ସହାୟତା ଢାଞ୍ଚାର ଆବଶ୍ୟକତାକୁ ଅନୁଭବ କରି କର୍ମଜୀବୀ ମହିଳାଙ୍କ ପାଇଁ ହଷ୍ଟେଲ ସୁବିଧା ସ୍ଥାପନ କରିବାକୁ ପ୍ରଭାତୀ ପରିଡ଼ା ଦାବି କରିଛନ୍ତି। ରାଜ୍ୟର ପ୍ରାୟ ୧ ଲକ୍ଷ ୪୦ ହଜାର ଅଙ୍ଗନବାଡ଼ି କର୍ମୀ ଏହି ପ୍ରସ୍ତାବ ଦ୍ୱାରା ଉପକୃତ ହେବେ, ଯେଉଁମାନେ ପ୍ରାୟ ୭୪ ହଜାର ଅଙ୍ଗନବାଡ଼ି କେନ୍ଦ୍ରରେ ନିୟୋଜିତ ଅଛନ୍ତି।
ଏହି ଶ୍ରମଶକ୍ତି ମାନେ ପୂର୍ବ ସରକାର ସମୟରେ ସେମାନଙ୍କ ଦାବି ନେଇ ଦୀର୍ଘ ସମୟ ଧରି ଆନ୍ଦୋଳନ କରିଥିଲେ। ତାଙ୍କୁ ଅନେକ ଥର ପ୍ରତିଶ୍ରୁତି ଦିଆଯାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ଠୋସ୍ ପଦକ୍ଷେପ ନିଆଯାଇନାହିଁ।
ଓଡ଼ିଶା ସରକାର ଅଙ୍ଗନବାଡ଼ି କର୍ମୀଙ୍କ ଦରମା ବୃଦ୍ଧି ପାଇଁ କେନ୍ଦ୍ରକୁ ପ୍ରସ୍ତାବ ଦେଇଥିବାରୁ ଆମେ ବହୁତ ଖୁସି। ଅନେକ ପ୍ରକଳ୍ପର ସଫଳ ରୂପାୟନ ପାଇଁ ଆମେ ସରକାରଙ୍କୁ ସାହାଯ୍ୟ କରିଛୁ। ଆମେ ସରକାରଙ୍କୁ ଧନ୍ୟବାଦ ଦେଉଛୁ ଯେ ସେମାନେ ଆମର ସମସ୍ୟା ବୁଝିଛନ୍ତି ଏବଂ ଆମର ଦରମା ବୃଦ୍ଧି ପାଇଁ ପଦକ୍ଷେପ ନେଇଛନ୍ତି ।
ପୂର୍ବ ସରକାର ଆମକୁ କେବଳ ମିଥ୍ୟା ପ୍ରତିଶ୍ରୁତି ଦେଇଥିଲେ। ବର୍ତମାନର ସରକାରଙ୍କ ଏହି ପଦକ୍ଷେପ ଆମ କର୍ମୀମାନଙ୍କୁ ଅଧିକ ଭଲ କାମ କରିବାକୁ ପ୍ରେରଣା ଯୋଗାଇବ ବୋଲି ଅଖିଳ ଓଡ଼ିଶା ଅଙ୍ଗନବାଡ଼ି କର୍ମୀ ସଂଘର ସଭାପତି ସୁନୀତା ମହାପାତ୍ର କହିଛନ୍ତି।
