ବିନା ପ୍ରମାଣରେ ଚରିତ୍ରକୁ ନେଇ ପ୍ରଶ୍ନ ଉଠାଇଥିବା ସ୍ୱାମୀଙ୍କୁ ଛାଡି ଅନ୍ଯତ୍ର ରହିବା ପତ୍ନୀଙ୍କ ନିଷ୍ପତ୍ତି ଠିକ୍ କହିଲେ ହାଇକୋର୍ଟ

କଟକ: ପାରିବାରିକ ବିବାଦରୁ ସମ୍ପର୍କରେ ତିକ୍ତତା ଆସିବା ପରେ ଅଲଗା ରହିବାକୁ ପସନ୍ଦ କରୁଥିବା ପତ୍ନୀଙ୍କୁ ସ୍ୱାମୀ ଆର୍ଥିକ ଭରଣପୋଷଣ ଯୋଗାଇ ଦେବେ ବୋଲି ବାରିପଦାର ପରିବାର ଅଦାଲତ ଦେଇଥିବା ରାୟକୁ ଓଡ଼ିଶା ହାଇକୋର୍ଟ ବଜାୟ ରଖିଛନ୍ତି। ନିକଟରେ ଏକ ରାୟରେ ଅଦାଲତ ସ୍ପଷ୍ଟ କରିଛନ୍ତି ଯେ ଯଦି ସ୍ୱାମୀ ବିନା ପ୍ରମାଣରେ ତାଙ୍କ ପତ୍ନୀଙ୍କ ଚରିତ୍ର ଉପରେ ଅଭିଯୋଗ କରନ୍ତି, ତେବେ ସେ ତାଙ୍କୁ ଛାଡିବା ସମ୍ପୂର୍ଣ୍ଣ ଠିକ୍।

ଅଦାଲତ ତାଙ୍କ ରାୟରେ କହିଛନ୍ତି ଯେ ଯେତେବେଳେ ସ୍ୱାମୀ ତାଙ୍କ ଚରିତ୍ର ଉପରେ ସନ୍ଦେହ କରନ୍ତି, ସେତେବେଳେ ସେ ତାଙ୍କ ସ୍ୱାମୀଙ୍କ ସହ ରହିବାକୁ ମନା କରିବା ସମ୍ପୂର୍ଣ୍ଣ ଯୁକ୍ତିଯୁକ୍ତ। ମାମଲା ଅନୁଯାୟୀ, ୨୦୨୧ ମେ’ ୫ ତାରିଖରେ ଦୁହିଁଙ୍କ ବିବାହ ହୋଇଥିଲା, କିନ୍ତୁ ଖୁବ୍ ଶୀଘ୍ର ଉଭୟଙ୍କ ସମ୍ପର୍କ ଖରାପ ହୋଇଯାଇଥିଲା। ୨୦୨୧ ଅଗଷ୍ଟ ୨୮ ତାରିଖରେ ସ୍ୱାମୀ ତାଙ୍କ ଚରିତ୍ରକୁ ନେଇ ପ୍ରଶ୍ନ କରିବାରୁ ପତ୍ନୀ ନିଜ ଶାଶୁଘର ଛାଡ଼ି ନିଜ ବାପ ଘରକୁ ପଳାଇ ଆସିଲେ।

ପରିବାର ଅଦାଲତର ଏହି ରାୟକୁ ଚ୍ୟାଲେଞ୍ଜ କରି ସ୍ୱାମୀ ଯୁକ୍ତି ବାଢ଼ିଥିଲେ ଯେ ତାଙ୍କ ପତ୍ନୀଙ୍କ ପାଖରେ ଶାଶୁଘର ଛାଡିବାର କୌଣସି ବୈଧ କାରଣ ନାହିଁ। ସେ ତାଙ୍କ ଉପରେ ଅବିଶ୍ୱାସର ଅଭିଯୋଗ ଆଣି କହିଥିଲେ ଯେ ସେ ଅନ୍ୟ ଜଣେ ପୁରୁଷଙ୍କ ସହ ସମ୍ପର୍କରେ ଥିଲେ। ତେବେ ନିଜ ଦାବିକୁ ପ୍ରମାଣିତ କରିବା ପାଇଁ ସେ କୌଣସି ପ୍ରମାଣ ଉପସ୍ଥାପନ କରିନଥିଲେ।

ଜଷ୍ଟିସ ଗୌରୀଶଙ୍କର ଶତପଥୀ କହିଛନ୍ତି, ଜଣେ ସ୍ତ୍ରୀ ନିଜ ସଚ୍ଚୋଟତା ଉପରେ ସନ୍ଦେହ କରୁଥିବା ସ୍ୱାମୀଙ୍କ ସହ ରହିବାକୁ ମନା କରିବା ସ୍ୱାଭାବିକ, କାରଣ ଜଣେ ମହିଳାଙ୍କ ସଚ୍ଚୋଟତା ତାଙ୍କର ଏକ ମୂଲ୍ୟବାନ ସମ୍ପତ୍ତି । ତେଣୁ ବିନା ପ୍ରମାଣରେ ସ୍ୱାମୀ ଯେତେବେଳେ ନିଜ ପତ୍ନୀଙ୍କ ଚରିତ୍ର ଉପରେ ସନ୍ଦେହ କରନ୍ତି, ସେତେବେଳେ ସ୍ୱାମୀଙ୍କଠାରୁ ଅଲଗା ହେବା ପାଇଁ ତାଙ୍କ ପାଖରେ ଯଥେଷ୍ଟ କାରଣ ଥାଏ । ”

ଏହି ମାମଲାରେ ପତ୍ନୀଙ୍କ ଅବିଶ୍ୱାସର କୌଣସି ପ୍ରମାଣ ନ ଦେଖାଇ ସ୍ୱାମୀ କେବଳ ନିଜ ପତ୍ନୀଙ୍କୁ ଚରିତ୍ର ହତ୍ୟା କରିଛନ୍ତି, ଯାହା ନିଜେ ପତ୍ନୀଙ୍କୁ ସ୍ୱାମୀଙ୍କ ସହ ରହିବାକୁ ମନା କରିବାର ଆଧାର ପାଲଟିଛି। ତେଣୁ ଏହି ମାମଲାରେ ବିନା କାରଣରେ ପତ୍ନୀ ତାଙ୍କ ସହ ରହୁନାହାନ୍ତି ବୋଲି ସ୍ୱାମୀଙ୍କ ଆବେଦନକୁ ଖାରଜ କରାଯିବା ଉଚିତ ଏବଂ ଏହାକୁ ବିଚାରକୁ ନିଆଯିବା ଉଚିତ ନୁହେଁ। ”
ଜଷ୍ଟିସ ଶତପଥୀ ପତ୍ନୀଙ୍କୁ ମାସିକ ୩ ହଜାର ଟଙ୍କା ଭରଣପୋଷଣ ଦେବାକୁ ସ୍ୱାମୀଙ୍କୁ ଦେଇଥିବା ନିର୍ଦ୍ଦେଶକୁ ମଧ୍ୟ ବଜାୟ ରଖିଛନ୍ତି।