ନୂଆବର୍ଷରେ ପୁରୀ ଆସୁଥିଲେ, ଜାଣି ରଖନ୍ତୁ ନିୟମ

ପୁରୀ: ଶ୍ରୀଜଗନ୍ନାଥ ମନ୍ଦିର ପ୍ରଶାସନ ପକ୍ଷରୁ ବର୍ଷ ଶେଷ ଦିନରେ ଶ୍ରୀମନ୍ଦିର ପ୍ରବେଶ ପାଇଁ ନୂଆ ପ୍ରୋଟୋକଲ ଲାଗୁ କରାଯାଇଛି। ଡିସେମ୍ବର ୩୧ ଓ ନୂଆବର୍ଷ ଦିନ ସାଧାରଣ ଶ୍ରଦ୍ଧାଳୁମାନେ କେବଳ ସିଂହଦ୍ୱାର ଦେଇ ମନ୍ଦିର ଭିତରକୁ ପ୍ରବେଶ କରିପାରିବେ ଏବଂ ଅନ୍ୟ ତିନୋଟି ଦ୍ୱାର ଦେଇ କେବଳ ପ୍ରସ୍ଥାନ ପାଇଁ ସୀମିତ ରହିବେ। ଶ୍ରଦ୍ଧାଳୁଙ୍କ ଭିଡକୁ ନିୟନ୍ତ୍ରଣ କରିବା ଉଦ୍ଦେଶ୍ୟରେ ଏହି ପଦକ୍ଷେପ ନିଆଯାଇଛି।

ପୁରୀ ଏସପି ବିନୀତ ଅଗ୍ରୱାଲ କହିଛନ୍ତି ଯେ, ବରିଷ୍ଠ ନାଗରିକ ଓ ଭିନ୍ନକ୍ଷମ ଶ୍ରଦ୍ଧାଳୁମାନେ ଘଣ୍ଟି ଦ୍ୱାର ଓ ଗରଡ଼ ଦ୍ୱାର ଭଳି ବିକଳ୍ପ ଦ୍ୱାର ଦେଇ ପ୍ରବେଶ କରିବାରେ ସହାୟତା କରିବା ପାଇଁ ଏକ ସ୍ୱତନ୍ତ୍ର ପୁଲିସ ଟିମ୍ ନିୟୋଜିତ ହେବେ।

ଡିସେମ୍ବର ୩୧ ଓ ଜାନୁଆରୀ ପହିଲାରେ ପ୍ରବଳ ଜନସମାଗମକୁ ଦୃଷ୍ଟିରେ ରଖି ଉଭୟ ଜିଲ୍ଲା ଓ ପୁଲିସ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ସିସିଟିଭି କ୍ୟାମେରା ଦ୍ୱାରା ସହର ଉପରେ ନଜର ରଖାଯିବ ଏବଂ ସୁରକ୍ଷା କର୍ମୀଙ୍କ ମଧ୍ୟରେ ୬୦ ପ୍ଲାଟୁନ ପୋଲିସ ଫୋର୍ସ, ୨ ଜଣ କମାଣ୍ଡାଣ୍ଟ ଅଫିସର, ୧୦ ଜଣ ଅତିରିକ୍ତ ଏସପି, ୩୩ ଡିଏସପି, ୨୪୫ ଇନ୍ସପେକ୍ଟର, ସବ୍ ଇନ୍ସପେକ୍ଟର ଏବଂ ୮୦୦ରୁ ଅଧିକ ହୋମଗାର୍ଡ ରହିବେ ।

ନୂଆବର୍ଷ ଅବସରରେ ମନ୍ଦିରକୁ ଆସୁଥିବା ସମସ୍ତ ଶ୍ରଦ୍ଧାଳୁଙ୍କ ପାଇଁ ସୁରୁଖୁରୁରେ ଏବଂ ଶୃଙ୍ଖଳିତ ଅନୁଭୂତି ସୁନିଶ୍ଚିତ କରିବା ପାଇଁ ଏହି ପଦକ୍ଷେପ ନିଆଯାଇଛି ।