ପାକିସ୍ତାନରେ ସ୍ୱାଧୀନତା ଦିବସ ଶୋକରେ ପରିଣତ: ଗୁଳିକାଣ୍ଡରେ 3 ଜଣଙ୍କର ମୃତ୍ୟୁ, 60 ରୁ ଅଧିକ ଆହତ

କରାଚୀ: ପାକିସ୍ତାନର ୭୮ ତମ ସ୍ୱାଧୀନତା ଦିବସ ଉତ୍ସବ ଗୁରୁବାର ଦିନ କରାଚୀରେ ଶୋକରେ ପରିଣତ ହୋଇଛି।ପାକିସ୍ତାନ ଜିଓ ନ୍ୟୁଜର ରିପୋର୍ଟ ଅନୁଯାୟୀ, ଉତ୍ସବ ସମୟରେ ଗୁଳିକାଣ୍ଡ ଫଳରେ ୩ ଜଣଙ୍କର ମୃତ୍ୟୁ ହୋଇଛି, ଯେତେବେଳେ ୬୦ ରୁ ଅଧିକ ଲୋକ ଆହତ ହୋଇଛନ୍ତି। ମୃତକଙ୍କ ମଧ୍ୟରେ ଜଣେ ବରିଷ୍ଠ ନାଗରିକ ଓ ୮ ବର୍ଷୀୟା ଝିଅ ଅଛନ୍ତି। ସୂଚନା ଅନୁଯାୟୀ, କରାଚୀର ବିଭିନ୍ନ ଅଞ୍ଚଳରେ ଏହି ଘଟଣା ଘଟିଛି। ଆଜିଜାବାଦରେ ଜଣେ ଝିଅ ରାସ୍ତାରେ ଯାଉଥିବା ବେଳେ ଗୁଳିରେ ଆହତ ହୋଇ ଘଟଣାସ୍ଥଳରେ ପ୍ରାଣ ହରାଇଛି। କୋରାଙ୍ଗିରେ ଜଣେ ବ୍ୟକ୍ତି ମଧ୍ୟ ଏହି ଗୁଳିକାଣ୍ଡରେ ମୃତ୍ୟୁବରଣ କରିଛନ୍ତି। ସ୍ଥାନୀୟ ପୋଲିସ କହିଛି, ଲିଆକତାବାଦ, ମହମୁଦବାଦ ଓ କୋରାଙ୍ଗି ସହିତ ଅନ୍ୟ ଅଞ୍ଚଳରେ ମଧ୍ୟ ଗୁଳିକାଣ୍ଡ ଘଟିଛି।

ଏହି ଘଟଣାରେ ଆହତ ଲୋକଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ସେମାନଙ୍କୁ ସିଭିଲ୍, ଜିନ୍ନା ଏବଂ ଆବାସି ସହିଦ ହସ୍ପିଟାଲକୁ ପଠାଯାଇଛି। ପୋଲିସ ମଧ୍ୟ ଏହାର କାର୍ଯ୍ୟ ଆରମ୍ଭ କରିଛି। ସୂଚନା ଅନୁଯାୟୀ, କିଛି ସନ୍ଦିଗ୍ଧଙ୍କୁ ମଧ୍ୟ ଗିରଫ କରାଯାଇଛି। ସେମାନଙ୍କଠାରୁ ଆଧୁନିକ ଅସ୍ତ୍ରଶସ୍ତ୍ର ଉଦ୍ଧାର କରାଯାଇଛି। ପାକିସ୍ତାନରେ ଗୁଳିକାଣ୍ଡ ଘଟଣା ବୃଦ୍ଧି ପାଇବାରେ ଲାଗିଛି ଏବଂ ଲୋକମାନେ ବେଆଇନ ଭାବରେ ଅସ୍ତ୍ର ରଖିବା ମଧ୍ୟ ଆରମ୍ଭ କରିଛନ୍ତି। ଏହି ପରି ଘଟଣା ପାକିସ୍ତାନରେ ଗତ ବର୍ଷ ଜାନୁଆରୀ ମାସରେ କରାଚୀରେ ପୂର୍ବରୁ ଘଟିଥିଲା ଯୋଉଥିରେ, ୪୨ ଜଣ ବ୍ୟକ୍ତି ତଥା ୫ ଜଣ ମହିଳା, ଗୁଳିକାଣ୍ଡରେ ମୃତ୍ୟୁବରଣ କରିଥିଲେ। ସେହି ସମୟରେ ୨୩୩ ଜଣ ଆହତ ହୋଇଥିଲେ।