ସ୍ୱାଧୀନତା ଦିବସର ଅବସରରେ ମିଥ୍ୟା ବିଜୟ ଦାବି କରି ଭାରତକୁ ନିଶାନା କଲେ ଶାହବାଜ

ନୂଆଦିଲ୍ଲୀ: ଅପରେସନ ସିନ୍ଦୁରରେ ପରାଜୟ ପରେ ମଧ୍ୟ ପାକିସ୍ତାନର ମିଥ୍ୟା ବାହାଦୁରି ଅବ୍ୟାହତ ରହିଛି। ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫ ୧୪ ଅଗଷ୍ଟ ସ୍ୱାଧୀନତା ଦିବସ ଅବସରରେ ପାକିସ୍ତାନର ବିଜୟ ସମ୍ବନ୍ଧୀୟ ମିଥ୍ୟା ଦାବି କରିଥିଲେ। ସେ କହିଥିଲେ ଯେ, ଚାରି ଦିନିଆ ସଂଘର୍ଷରେ ପାକିସ୍ତାନ ଏକ “ଐତିହାସିକ ବିଜୟ” ହାସଲ କରିଛି।

ଇନଷ୍ଟାଗ୍ରାମରେ ପୋଷ୍ଟ କରି, ସେ ପାକିସ୍ତାନର ଲୋକଙ୍କୁ ଶୁଭେଚ୍ଛା ଜଣାଇଥିଲେ ଏବଂ ଜାତିର ପିତା ମହମ୍ମଦ ଅଲି ଜିନ୍ନା, ଆଲ୍ଲାମା ମହମ୍ମଦ ଇକବାଲ ସହ ଅନ୍ୟ ସ୍ୱାଧୀନତା ସଂଗ୍ରାମୀଙ୍କୁ ସ୍ମରଣ କରିଥିଲେ। ସେମାନଙ୍କୁ “ଏକ ସ୍ୱାଧୀନ ଦେଶ ସୃଷ୍ଟି କରି ଇତିହାସର ଗତିପଥ ବଦଳାଇଥିବା” ବୋଲି ଗଣନା କରିଥିଲେ।

କିନ୍ତୁ, ଶାହବାଜ ସରିଫ ଭାରତ ବିରୋଧରେ ବଡ଼ ମିଥ୍ୟା କହିଥିଲେ। ସେ ଅପରେସନ ସିନ୍ଦୁର ସମୟରେ ସଂଘର୍ଷ ପାଇଁ ସମ୍ପୂର୍ଣ୍ଣ ଭାରତକୁ ଦାୟୀ କରି, କହିଥିଲେ — “ଭାରତ ଆମ ଠାରେ ଯୁଦ୍ଧ ଲଦିଥିଲା, କିନ୍ତୁ ପାକିସ୍ତାନ ଏଥିରେ ଏକ ଐତିହାସିକ ବିଜୟ ପାଇଥିଲା।” ସେ ଆହୁରି କହିଥିଲେ ଯେ, ଏହି ବିଜୟ ପାକିସ୍ତାନର ସ୍ୱାଧୀନତାର ପବିତ୍ରତାକୁ ସୁଦୃଢ଼ କରିଛି ଏବଂ ଲୋକଙ୍କ ହୃଦୟରେ ଦେଶପ୍ରେମକୁ ଜାଗ୍ରତ କରିଛି।