ସ୍ୱାମୀଙ୍କ ବିଶ୍ୱାସଘାତକତାର ପର୍ଦ୍ଦାଫାସ୍ କଲା ଟୁଥବ୍ରଶ୍!
ଲଣ୍ଡନ: ପରକୀୟା ସମ୍ପର୍କକୁ ପ୍ରମାଣିତ କରିବାକୁ ସାଧାରଣତଃ ଫୋନ୍, ମେସେଜ୍ କିମ୍ବା ସୋସିଆଲ ମିଡିଆକୁ ପ୍ରମାଣ ଭାବେ ବ୍ୟବହାର କରାଯାଏ। କିନ୍ତୁ ବ୍ରିଟେନରେ ଘଟିଥିବା ଏକ ଅନନ୍ୟ ମାମଲାରେ ଜଣେ ମହିଳା ତାଙ୍କ ସ୍ୱାମୀଙ୍କ ବିଶ୍ୱାସଘାତକତାକୁ ଏକ ଇଲେକ୍ଟ୍ରିକ୍ ଟୁଥବ୍ରଶ୍ର ଡାଟା ମାଧ୍ୟମରେ ପ୍ରମାଣ କରିଛନ୍ତି।
ମିଳିଥିବା ସୂଚନାନୁସାରେ, ମହିଳାଙ୍କୁ ସନ୍ଦେହ ହୋଇଥିଲା ଯେ ସ୍ୱାମୀଙ୍କ ପ୍ରେମ ସମ୍ପର୍କ ଅଛି। କାରଣ, ସେ କାମରେ ଅଧିକ ସମୟ ବିତାଉଥିଲେ । ଠୋସ୍ ପ୍ରମାଣ ନଥିବାରୁ ସେ ଜଣେ ବ୍ୟକ୍ତିଗତ ଗୁଇନ୍ଦା ଏଜେନ୍ସି ଚଳାଉଥିବା ପଲ୍ ଜୋନ୍ସଙ୍କ ସାହାଯ୍ୟ ନେଲେ।
ଘଟଣାର ମୂଳ କାରଣ ଥିଲା ଏକ ସ୍ମାର୍ଟ ଇଲେକ୍ଟ୍ରିକ୍ ଟୁଥବ୍ରଶ୍ ଆପ୍। ମହିଳା ତାଙ୍କ ପିଲାମାନଙ୍କ ଦାନ୍ତ ସଫେଇ ଅଭ୍ୟାସକୁ ଉନ୍ନତ କରିବା ପାଇଁ ଏହି ଆପ୍ ଇନଷ୍ଟଲ କରିଥିଲେ। ଏହି ଆପ୍ ପରିବାରର ପ୍ରତ୍ୟେକ ସଦସ୍ୟଙ୍କ ବ୍ରଶିଂ ସେସନ୍କୁ ଟ୍ରାକ୍ କରୁଥିଲା। କିଛି ଦିନ ପରେ, ମହିଳା ଲକ୍ଷ୍ୟ କଲେ ଯେ ତାଙ୍କ ସ୍ୱାମୀଙ୍କ ବ୍ରଶିଂ ସମୟ ଅସ୍ୱାଭାବିକ ଥିଲା। ସେ ଶୁକ୍ରବାର ସକାଳେ ଘରେ ଦାନ୍ତ ସଫା କରୁଥିବା ଦେଖାଗଲା, ଯେତେବେଳେ ସେ କାର୍ଯ୍ୟାଳୟରେ ଥିବା ଦାବି କରୁଥିଲେ।
ଏହା ମହିଳାଙ୍କ ସନ୍ଦେହକୁ ଆହୁରି ଦୃଢ କରିଥିଲା। ସେ ପଲ ଜୋନ୍ସଙ୍କୁ ଏହି ଡାଟା ଦେଖାଇଥିଲେ, ଯିଏ ତଦନ୍ତ ଆରମ୍ଭ କରିଥିଲେ। ତଦନ୍ତରୁ ଜଣାପଡ଼ିଲା ଯେ ସ୍ୱାମୀ ଗତ ତିନି ମାସ ଧରି ଶୁକ୍ରବାର ଦିନ କାର୍ଯ୍ୟାଳୟ ଯାଉନଥିଲେ। ବରଂ, ସେ ପରିବାର ଘରେ ନଥିବା ସମୟରେ ଜଣେ ସହକର୍ମୀଙ୍କ ସହ ସମୟ ବିତାଉଥିଲେ। ଟୁଥବ୍ରଶ୍ ଆପ୍ର ଟାଇମଷ୍ଟାମ୍ପ ଡାଟା ଏହି ବିଶ୍ୱାସଘାତକତାର ଅଖଣ୍ଡନୀୟ ପ୍ରମାଣ ପ୍ରଦାନ କରିଥିଲା।
ପଲ ଜୋନ୍ସ କହିଛନ୍ତି, “ଡାଟା ମିଛ କହେ ନାହିଁ। ଯେତେବେଳେ ଏକ ଡିଭାଇସ୍ ଦର୍ଶାଏ ଯେ କେହି ସକାଳ ୧୦:୪୮ରେ ଦାନ୍ତ ସଫା କରିଛନ୍ତି, ଯେତେବେଳେ ସେ କାର୍ଯ୍ୟାଳୟରେ ଥିବା କହିବା ସମ୍ପୂର୍ଣ୍ଣ ମିଛ | ଏହି ପ୍ରମାଣ ସହିତ ମହିଳା ତାଙ୍କ ସ୍ୱାମୀଙ୍କ ସାମ୍ନା କରିଥିଲେ, ଏବଂ ଶେଷରେ ସ୍ୱାମୀ ତାଙ୍କ ପରକୀୟା ସମ୍ପର୍କକୁ ସ୍ୱୀକାର କରିଥିଲେ|
