ଜନସଂଖ୍ୟା ବଢାଇବାକୁ ପୁଟିନଙ୍କ ଘୋଷଣା: ଗର୍ଭବତୀ ସ୍କୁଲ-କଲେଜ ଛାତ୍ରୀଙ୍କୁ ଲକ୍ଷେ ଟଙ୍କା

ମସ୍କୋ:ଜନସଂଖ୍ୟା ବୃଦ୍ଧି ପାଇଁ ପୁଟିନଙ୍କ ନୂଆ ଯୋଜନା | ରୁଷିଆରେ ଜନସଂଖ୍ୟା ହ୍ରାସ ନେଇ ଚିନ୍ତା ବଢ଼ୁଥିବା ବେଳେ ରାଷ୍ଟ୍ରପତି ଭ୍ଲାଡିମିର ପୁଟିନଙ୍କ ସରକାର ଏକ ନୂଆ ଯୋଜନା ଘୋଷଣା କରିଛନ୍ତି। ଏହି ଯୋଜନା ଅନୁସାରେ, ସ୍କୁଲ ଓ କଲେଜ ଛାତ୍ରୀମାନେ ଗର୍ଭବତୀ ହେଲେ ସେମାନଙ୍କୁ ୧ ଲକ୍ଷ ଟଙ୍କା (୧୦୦,୦୦୦ ରୁବେଲ୍) ଏକକାଳୀନ ନଗଦ ପୁରସ୍କାର ଦିଆଯିବ। ଏହି ପଦକ୍ଷେପ ଜନସଂଖ୍ୟା ବୃଦ୍ଧି ପାଇଁ ମହିଳାମାନଙ୍କୁ ଶୀଘ୍ର ବିବାହ ଓ ସନ୍ତାନ ଜନ୍ମ ପାଇଁ ପ୍ରୋତ୍ସାହିତ କରିବାକୁ ଲକ୍ଷ୍ୟ ରଖିଛି।
କ୍ରମାଗତ ହ୍ରାସ ପାଉଥିବା ଜନ୍ମହାର, ୟୁକ୍ରେନ ଯୁଦ୍ଧରେ ହଜାର ହଜାର ଯୁବକଙ୍କ ମୃତ୍ୟୁ ଏବଂ ବଢ଼ୁଥିବା ପ୍ରବାସ ହାର ଜନସଂଖ୍ୟା ସଙ୍କଟକୁ ଆହୁରି ଗମ୍ଭୀର କରିଛି। ୨୦୨୪ର ପ୍ରଥମାର୍ଦ୍ଧରେ ମାତ୍ର ୫.୯୯ ଲକ୍ଷ ଶିଶୁ ଜନ୍ମ ହୋଇଥିବା ବେଳେ, ମାସିକ ଜନ୍ମହାର ଗତ ୨୫ ବର୍ଷରେ ପ୍ରଥମ ଥର ପାଇଁ ୧ ଲକ୍ଷ ତଳକୁ ଖସିଛି।
ଏହି ସଙ୍କଟ ରୋକିବା ପାଇଁ ରୁଷିଆ ସରକାର କେମେରୋଭୋ, କାରେଲିଆ, ଟୋମସ୍କ ଆଦି ଅଞ୍ଚଳରେ ଛାତ୍ରୀମାନଙ୍କୁ ଗର୍ଭବତୀ ହେବା ପାଇଁ ପ୍ରୋତ୍ସାହନ ଦେଉଛନ୍ତି। ୨୨ ସପ୍ତାହର ଗର୍ଭବତୀ ହୋଇ ସରକାରୀ ପ୍ରସୂତି କ୍ଲିନିକରେ ପଞ୍ଜିକୃତ ହେଲେ ଛାତ୍ରୀମାନେ ୧ ଲକ୍ଷ ଟଙ୍କା ପାଇବେ।
ଏହା ବ୍ୟତୀତ, ରୁଷିଆ ସରକାର ମାତୃତ୍ୱ ପୁଞ୍ଜି କାର୍ଯ୍ୟକ୍ରମରେ ଦ୍ୱିତୀୟ ଓ ତୃତୀୟ ସନ୍ତାନ ପାଇଁ ଲକ୍ଷାଧିକ ଟଙ୍କା, ଗୃହ ସବସିଡି, ମାଗଣା ଜମି, ମାସିକ ଶିଶୁ ଭତ୍ତା, ୩ ବର୍ଷର ପ୍ରସୂତି ଛୁଟି, ଟିକସ ରିହାତି ଏବଂ ସାମାଜିକ ସମ୍ମାନ ଭଳି ଅନେକ ପ୍ରୋତ୍ସାହନ ଯୋଗାଉଛନ୍ତି।
ସରକାରଙ୍କ ଅନୁମାନ ଅନୁସାରେ, ଜନସଂଖ୍ୟା ହ୍ରାସ ନ ରୋକା ଗଲେ, ୨୧୦୦ ସୁଦ୍ଧା ରୁଷିଆର ଜନସଂଖ୍ୟା ୧୪୬ ନିୟୁତରୁ ୭୪ ନିୟୁତକୁ ଖସିଯିବ। ଏହି ଯୋଜନା ଏକ ଜାତୀୟ ପ୍ରାଥମିକତା ଭାବେ ଗ୍ରହଣ କରାଯାଇଛି, ଯାହା ବିଶ୍ୱବ୍ୟାପୀ ଆଲୋଚନାର ବିଷୟ ହୋଇଛି।