ସଂସଦରେ ସ୍ୱତନ୍ତ୍ର ରାଜ୍ୟ ପାହ୍ୟା ଉଠାଇବାକୁ ଦଳୀୟ ସାଂସଦଙ୍କୁ କହିଲେ ନବୀନ
ଭୁବନେଶ୍ୱର: ବଜେଟ୍ ଅଧିବେଶନରେ ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ପାହ୍ୟା ମାନ୍ୟତା ଦାବିରେ ସଂସଦରେ ଦୃଢ଼ ସ୍ୱର ଉତ୍ତୋଳନ କରିବାକୁ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଦଳର ସାଂସଦମାନଙ୍କୁ କହିଛନ୍ତି।
ନବୀନ ନିବାସରେ ବିଜେଡି ସଂସଦୀୟ ଦଳ ବୈଠକରେ ଅଧ୍ୟକ୍ଷତା କରି ନବୀନ ୭ ଜଣ ରାଜ୍ୟସଭା ସଦସ୍ୟଙ୍କୁ ସଂସଦରେ ଓଡ଼ିଶାର ସ୍ୱର ହେବାକୁ କହିଛନ୍ତି। ପ୍ରତ୍ୟେକ ସାଂସଦ ଓଡ଼ିଶାର ସାଢ଼େ ୪ କୋଟି ଲୋକଙ୍କ ଅଧିକାର ଓ ସମ୍ମାନ ପାଇଁ ଲଢ଼େଇ କରିବା ଦରକାର।
ବଜେଟ୍ ଅଧିବେଶନରେ ବିଜେଡି ସାଂସଦମାନେ କ’ଣ ପ୍ରସଙ୍ଗ ଉଠାଇବେ ସେ ସମ୍ପର୍କରେ ନବୀନ ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ପାହ୍ୟା ପ୍ରସଙ୍ଗକୁ ସବୁଠାରୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଭାବେ ଗ୍ରହଣ କରିବାକୁ କହିଥିଲେ।
ବର୍ଦ୍ଧିତ ମୂଲ୍ୟ ଓ ମୁଦ୍ରାସ୍ଫୀତି ସହିତ ଉଚ୍ଚ ବେକାରୀ ଏବଂ ବଢୁଥିବା ବେରୋଜଗାରୀ ପ୍ରସଙ୍ଗ ଉଠାଇବାକୁ ସେ ପରାମର୍ଶ ଦେଇଛନ୍ତି ।
କୋଇଲା ରୟାଲଟି ପ୍ରସଙ୍ଗ ବ୍ୟତୀତ ଓଡ଼ିଶାର କୃଷକମାନଙ୍କ ଦୁର୍ଦ୍ଦଶା ସ୍ଥିତି ଏବଂ ପୋଲାଭରମ ଓ ମହାନଦୀ ବିବାଦ ସମ୍ପର୍କରେ ମଧ୍ୟ ଆଲୋକପାତ କରିବାକୁ ସାଂସଦମାନଙ୍କୁ କୁହାଯାଇଥିଲା।
ସ୍ୱାସ୍ଥ୍ୟ କ୍ଷେତ୍ରରେ ଭୁବନେଶ୍ୱର ଭଳି ସମ୍ବଲପୁର, କୋରାପୁଟ ଓ ବାଲେଶ୍ୱର (ସାଟେଲାଇଟ୍ ୟୁନିଟ୍ ନୁହେଁ) ରେ ପୂର୍ଣ୍ଣାଙ୍ଗ ଏମ୍ସ ହସ୍ପିଟାଲ ପ୍ରତିଷ୍ଠା ପାଇଁ ଦାବି ହେବା ଦରକାର। ସେହିପରି କିଛି ସମ୍ପ୍ରଦାୟକୁ ଅନୁସୂଚିତ ଜନଜାତି (ଏସଟି) ମାନ୍ୟତା ଦେବା ପାଇଁ ରାଜ୍ୟ ସରକାରଙ୍କ ଦାବି କେନ୍ଦ୍ର ନିକଟରେ ବିଚାରାଧୀନ ରହିଛି ବୋଲି ନବୀନ କହିଛନ୍ତି।
