ନବଜାତ ଛୁଆକୁ ବିକ୍ରି କରି ବାପା କିଣିଲା ବାଇକ୍!
ବସ୍ତା: ବାଲେଶ୍ୱର ଜିଲ୍ଲା ବସ୍ତା ଥାନା ଅଞ୍ଚଳର ଜଣେ ଦମ୍ପତି ଅଭିଯୋଗ କରିଛନ୍ତି ଯେ, ମୟୂରଭଞ୍ଜ ଜିଲ୍ଲା ସାନକୁଳା ଗ୍ରାମର ଜଣେ ନିଃସନ୍ତାନ ଦମ୍ପତିଙ୍କୁ ସେମାନେ ୬୦ ହଜାର ଟଙ୍କାରେ ନିଜ ୯ ଦିନର ଶିଶୁକୁ ବିକ୍ରି କରିଥିଲେ । ଆଉ ଏହି ଟଙ୍କାରୁ ସେମାନେ କିଛି ଟଙ୍କା ଖର୍ଚ୍ଚ କରି ବାଇକ୍ କିଣିଛନ୍ତି।
ତେବେ ଦାରିଦ୍ର୍ୟ କାରଣରୁ ସେମାନେ ସନ୍ତାନକୁ ପ୍ରତିପୋଷଣ କରିବାରେ ଅସମର୍ଥ ହୋଇଥିବାରୁ ସେମାନେ ଶିଶୁଟିକୁ ଦାନ କରିଛନ୍ତି ବୋଲି କହିଛନ୍ତି। ବେଆଇନ କାର୍ଯ୍ୟ ସମ୍ପର୍କରେ ଖବର ପାଇ ପୁଲିସ ଓ ଶିଶୁ କଲ୍ୟାଣ ସମିତିର ମିଳିତ ଟିମ୍ ଶନିବାର ଉଦଳାରେ ପହଞ୍ଚି ଶିଶୁଟିକୁ ଉଦ୍ଧାର କରିଥିଲେ।
ଶିଶୁଟି ବିକ୍ରି ହେଉଥିବା ଖବର ପାଇବା ପରେ ଆମେ ପୁଲିସ ସହ ମିଶି ଶିଶୁଟିକୁ କିଣିଥିବା ଦମ୍ପତିଙ୍କୁ ଠାବ କରିଥିଲୁ। ଏହାପରେ ନବଜାତ ଶିଶୁକୁ ସୁରକ୍ଷିତ ଭାବେ ଉଦ୍ଧାର କରାଯାଇଛି ବୋଲି ଶିଶୁ କଲ୍ୟାଣ ସମିତି ସଦସ୍ୟ ମନମୋହନ ପ୍ରଧାନ କହିଛନ୍ତି। ତେବେ ଶିଶୁକୁ କିଣିଥିବା ଦମ୍ପତି ଓ ସେମାନଙ୍କ ସମ୍ପର୍କୀୟମାନେ ବିନା ଟଙ୍କାରେ ଶିଶୁଟିକୁ ନେଇଥିବା ସ୍ୱୀକାର କରିଥିବା ବେଳେ ଶିଶୁର ପିତାମାତା ମଧ୍ୟ ପିଲାଟିକୁ ଟଙ୍କା ପାଇଁ ବିକ୍ରି କରିନାହାନ୍ତି କି କ୍ରେତାଙ୍କଠାରୁ ଟଙ୍କା ନେଇନଥିବା କହିଛନ୍ତି।
ଅଭିଯୋଗ ଅନୁଯାୟୀ, ନବଜାତ ଶିଶୁର ପିତାମାତା ଶିଶୁଟିକୁ ୬୦ ହଜାର ଟଙ୍କାରେ ବିକ୍ରି କରିଥିବା ବେଳେ ବାପା କିଛି ଟଙ୍କା ଖର୍ଚ୍ଚ କରି ମୋଟର ସାଇକେଲ କିଣିଥିବା ଅଭିଯୋଗ ହୋଇଛି। ଶିଶୁ କଲ୍ୟାଣ ସମିତି ଉଭୟ ପରିବାରକୁ ଅଧିକ ତଦନ୍ତ ପାଇଁ ଡକାଇଛି।
ଶିଶୁର ମା’ ଶାନ୍ତି ପାତ୍ର ଏହି ଅଭିଯୋଗକୁ ଖଣ୍ଡନ କରି କହିଛନ୍ତି, ମୁଁ ଏକ ପୁତ୍ର ସନ୍ତାନକୁ ଜନ୍ମ ଦେଇଥିଲି କିନ୍ତୁ ମୁଁ ତାକୁ ଲାଳନପାଳନ କରିପାରିନଥିଲି। ତେଣୁ ମୁଁ ଏହାକୁ ଏକ ସନ୍ତାନହୀନ ଦମ୍ପତିଙ୍କୁ ଦାନ କରିଥିଲି । ମୁଁ ମୋ ପିଲାକୁ ବିକ୍ରି କରିନାହିଁ। “
