୭୦ଟି ଦେଶରେ ୧୦,୫୭୪ ଭାରତୀୟ ବନ୍ଦୀ, ୧୧ଟି ଦେଶରେ ୪୩ ଜଣ ମୃତ୍ୟୁଦଣ୍ଡ ଅପେକ୍ଷାରେ
ନୂଆଦିଲ୍ଲୀ: ବିଶ୍ୱର ୭୦ଟି ଦେଶରେ ୧୦,୫୭୪ ଜଣ ଭାରତୀୟ ନାଗରିକ ଜେଲରେ ବନ୍ଦୀ ଅଛନ୍ତି, ଯେଉଁମାନଙ୍କ ମଧ୍ୟରୁ ୧୧ଟି ଦେଶରେ ୪୩ ଜଣ ମୃତ୍ୟୁଦଣ୍ଡର ଅପେକ୍ଷାରେ ଅଛନ୍ତି ବୋଲି ବୈଦେଶିକ ବ୍ୟାପାର ମନ୍ତ୍ରଣାଳୟ ଲୋକସଭାରେ ସୂଚନା ଦେଇଛି। ବୈଦେଶିକ ବ୍ୟାପାର ରାଷ୍ଟ୍ରମନ୍ତ୍ରୀ କିର୍ତ୍ତି ବର୍ଦ୍ଧନ ସିଂହ ଲିଖିତ ଉତ୍ତରରେ ଏହି ତଥ୍ୟ ପ୍ରକାଶ କରିଛନ୍ତି।
ବିଦେଶରେ ମୃତ୍ୟୁଦଣ୍ଡାଦେଶ ପାଇଥିବା ୪୩ ଜଣ ଭାରତୀୟଙ୍କ ମଧ୍ୟରୁ ସର୍ବାଧିକ ୨୧ ଜଣ ସଂଯୁକ୍ତ ଆରବ ଏମିରେଟ୍ସରେ ଅଛନ୍ତି। ସାଉଦି ଆରବରେ ୭ଟି ମାମଲା ଥିବା ବେଳେ ଚୀନ୍ରେ ୪ଟି, ଇଣ୍ଡୋନେସିଆରେ ୩ଟି, ୟେମେନରେ ୧ଟି ଏବଂ ବାକି ଅନ୍ୟ ଦେଶରେ ରହିଛି। ଜୁଲାଇ ୧୫, ୨୦୨୫ ସୁଦ୍ଧା ୨୮ ଜଣ ଭାରତୀୟ ମତ୍ସ୍ୟଜୀବୀ ଶ୍ରୀଲଙ୍କାରେ ବନ୍ଦୀ ଅଛନ୍ତି। ନିକଟରେ ଶ୍ରୀଲଙ୍କା ରାଷ୍ଟ୍ରପତିଙ୍କ ସହ ଏକ ବୈଠକରେ ପ୍ରଧାନମନ୍ତ୍ରୀ ନିଜେ ଏହି ପ୍ରସଙ୍ଗ ଉଠାଇଛନ୍ତି। ସରକାର କହିଛନ୍ତି ଯେ ଭାରତୀୟ ଦୂତାବାସଗୁଡିକ ଅନେକ ଦେଶ ସହିତ ସ୍ଥାନାନ୍ତର ଚୁକ୍ତି ଅଧୀନରେ ଆଇନଗତ ସହାୟତା ଓ ଦୂତାବାସ ଆକ୍ସେସ୍ ଯୋଗାଇବା ସହ କଏଦୀଙ୍କ ମୁକ୍ତି ଦିଗରେ କାର୍ଯ୍ୟ କରୁଛନ୍ତି। ଗତ ଏକ ଦଶନ୍ଧି ମଧ୍ୟରେ ବିଦେଶୀ ଜେଲରେ ଥିବା ଭାରତୀୟଙ୍କ ସଂଖ୍ୟା ୬୩% ବୃଦ୍ଧି ପାଇଛି। ୨୦୧୬ରେ ୬,୪୮୯ ଜଣ ଭାରତୀୟ ବିଦେଶରେ ବନ୍ଦୀ ହୋଇଥିଲେ। ୨୦୨୫ ଅଗଷ୍ଟ ସୁଦ୍ଧା ଏହି ସଂଖ୍ୟା ୧୦,୫୭୪ରେ ପହଞ୍ଚିଥିଲା। ଉପସାଗରୀୟ ଅଞ୍ଚଳରେ ସର୍ବାଧିକ ବନ୍ଦୀ ଅଛନ୍ତି। ୨୦୧୬ରେ ସାଉଦି ଆରବରେ ୧୬୫୩, ୟୁଏଇରେ ୮୩୮, କୁଏତରେ ୪୫୯, କତାରରେ ୧୩୯, ଓମାନରେ ୧୦୯ ଓ ବାହାରେନରେ ୬୮ ଜଣ ଭାରତୀୟଙ୍କ ସମେତ ୩୨୬୬ ଜଣ ଭାରତୀୟ ଉପସାଗରୀୟ ଜେଲରେ ଥିଲେ। ୨୦୨୫ ବେଳକୁ ଏହି ସଂଖ୍ୟା ଦ୍ୱିଗୁଣିତ ହୋଇ ୬,୬୭୧ରେ ପହଞ୍ଚିଛି।
ଭାରତୀୟ ଦୂତାବାସ ଓ କନସୁଲେଟଗୁଡ଼ିକ ବିଦେଶରେ ବନ୍ଦୀ ଭାରତୀୟଙ୍କୁ ଆଇନଗତ ଓ କନସୁଲାର ସହାୟତା ଯୋଗାଇ ଦେଉଛନ୍ତି। ଭାରତୀୟ ସମୁଦାୟ କଲ୍ୟାଣ ପାଣ୍ଠି (ଆଇସିଡବ୍ଲୁଏଫ) ମାଧ୍ୟମରେ ଆର୍ଥିକ ଓ ଆଇନଗତ ସହାୟତା ପ୍ରଦାନ କରାଯାଉଛି। ଶ୍ରୀଲଙ୍କାରେ ୨୮ ଜଣ ଭାରତୀୟ ମତ୍ସ୍ୟଜୀବୀଙ୍କ ମୁକ୍ତି ପାଇଁ ପ୍ରଧାନମନ୍ତ୍ରୀ ଶ୍ରୀଲଙ୍କା ରାଷ୍ଟ୍ରପତିଙ୍କ ସହ ଆଲୋଚନା କରିଛନ୍ତି। ଅନେକ ଦେଶରେ କଠୋର ଗୋପନୀୟତା ଆଇନ ଯୋଗୁଁ ବନ୍ଦୀଙ୍କ ବିସ୍ତୃତ ବିବରଣୀ ପାଇବା କଷ୍ଟକର। ଏହା ଯୋଗୁଁ ପ୍ରକୃତ ବନ୍ଦୀ ସଂଖ୍ୟା ଏହାଠାରୁ ଅଧିକ ହୋଇପାରେ। ଏକ୍ସ ପ୍ଲାଟଫର୍ମରେ ଥିବା ପୋଷ୍ଟ ଅନୁସାରେ, ସ୍ଥାନୀୟ ଆଇନ ସମ୍ବନ୍ଧୀୟ ଅଜ୍ଞତା, ସୁନା କିମ୍ବା ମାଦକ ଦ୍ରବ୍ୟ ଚୋରାଚାଲାଣ ପରି ଅପରାଧ ଯୋଗୁଁ ଅନେକ ଭାରତୀୟ ମଧ୍ୟପ୍ରାଚ୍ୟ ଦେଶଗୁଡ଼ିକରେ କଠୋର ଦଣ୍ଡ ଭୋଗୁଛନ୍ତି। ଏହାର ସମାଧାନ ପାଇଁ ବିଦେଶ ଯାତ୍ରା ପୂର୍ବରୁ ସଚେତନତା କାର୍ଯ୍ୟକ୍ରମ ଓ ଶିକ୍ଷାର ଆବଶ୍ୟକତା ରହିଛି।
